Ժողովրդական պաշտպան. Բաթումիի ողբերգությունը ևս մեկ անգամ մատնանշում է պետության պարտավորությունը՝ ապահովելու հանրային տարածքների անվտանգությունը և դրանց մշտական մոնիտորինգը
Վրաստանի Ժողովրդական պաշտպան Լևան Իոսելիանին խորը ցավ և ցավակցություն է հայտնում Բաթումիում երկու անչափահաս երեխաների ողբերգական մահվան կապակցությամբ։ Այս մասին հայտնում է Ժողովրդական պաշտպանի ֆեյսբուքյան էջը։
«Ցավակցում ենք ընտանիքին, հարազատներին, ողջ Վրաստանին։ Մարդկանց կյանքի և առողջության համար անվտանգ միջավայրի ստեղծումը պետության առաջնահերթ պարտավորությունն է։ Իսկ երեխաների կյանքի ու բարեկեցության պաշտպանությունը պետք է լինի պետության առաջնահերթ խնդիրը։
Այս ողբերգությունը ևս մեկ անգամ մատնանշում է պետության պարտավորությունը՝ պատասխանատվությամբ մոտենալ քաղաքաշինությանը, ապահովել հանրային տարածքների անվտանգությունը և մշտապես վերահսկել դրանք՝ կանխելու նմանատիպ ողբերգական դեպքերը։
Ժողովրդական պաշտպանը ևս մեկ անգամ իր ցավակցությունն է հայտնում մահացածների ընտանիքներին և կոչ է անում համապատասխան մարմիններին ապահովել օպերատիվ և օբյեկտիվ քննություն՝ մեղավորներին բացահայտելու և օրենքով նախատեսված պատասխանատվության ենթարկելու համար։ Զարգացնել արդյունավետ կանխարգելիչ և արձագանքման մեխանիզմներ՝ հանրային տարածքներում և շինարարական ու ենթակառուցվածքային նախագծերում անվտանգության չափանիշներ ապահովելու համար», – նշում է Ժողովրդական պաշտպան Լևան Իոսելիանին։