Ռուսաստանի նախագահի օգնական Յուրի Ուշակովի խոսքով՝ մամուլում հայտնված ձայնագրությունը նպատակ ունի վնասել Ռուսաստանի և ԱՄՆ-ի միջև հարաբերություններին։ Ինչպես նշել է Ուշակովը, ինչ-որ մեկը հատուկ է կազմակերպել այդ խոսակցության արտահոսքը, որպեսզի վնասի երկու երկրների համագործակցությանը։

«Ցանկալի չէ կարծել, թե սա արվում է հարաբերությունների բարելավման նպատակով։ Ինչ-որ մեկը տարածում է տեղեկատվություն, ինչ-որ մեկը լսում է, բայց մենք՝ ոչ», – ասել է Ուշակովը։

Նա նաև նշել է, որ իր և Սթիվ Ուիթքոֆի միջև հաճախ են տեղի ունենում զրույցներ, սակայն Ռուսաստանը կապ չունի այդ զրույցների հրապարակման հետ։

«Այդ զրույցները գաղտնի բնույթ ունեն։ Ես մեկնաբանություններ չեմ անում այդ մասին, և ոչ ոք չպետք է մեկնաբանի», – նշել է Ուշակովը։

Նա նաև հայտնել է, որ հաջորդ շաբաթ Սթիվ Ուիթքոֆը ամերիկյան վարչակազմի մի քանի ներկայացուցիչների հետ միասին կայցելի Մոսկվա։

«Նա կգա հաջորդ շաբաթ։ Նրա հետ միասին կլինեն նաև ԱՄՆ վարչակազմի այլ բարձրաստիճան պաշտոնյաներ, ովքեր Ուկրաինայի հարցերով են զբաղվում», – նշել է Ուշակովը։

Հիշեցնենք, որ Bloomberg-ը հրապարակել էր ձայնագրություն, ըստ որի՝ ԱՄՆ նախագահի ներկայացուցիչ Սթիվ Ուիթքոֆը և Ռուսաստանի նախագահի օգնական Յուրի Ուշակովը քննարկում են, թե ինչպես կարող է Ռուսաստանը լավագույնս ներկայացնել իր առաջարկները խաղաղության վերաբերյալ նախագահ Թրամփին։