«Եվրոպական Վրաստանի» անդամին հնարավորություն չեն տվել կողպեք դնել Թելավի մեծամասնական պատգամավորի գրասենյակի դռանը
«Եվրոպական Վրաստանի» Թելավի կազմակերպության ղեկավար, Լելա Մենթեշաշվիլին գնացել էր կողպեք դնելու Թելավի մունիցիպալիտետի մեծամասնական պատգամավորի, Գելա Սամխարաուլիի գրասենյակի դռան վրա, սակայն իրավապահները նրան թույլ չեն տվել:
Լելա Մենթեշաշվիլիի խոսքով, նա Թելավիի սակրեբուլի անդամ է, հետևաբար շենք մուտք գործելու խնդիր չի ունեցել, սակայն մեծամասնական պատգամավորի գրասենյակի դուռը հսկում են ոստիկանները և իրեն թույլ չեն տվել կողպեք դնել:
«Կողպեք դնելը կրում է խորհրդանշական բնույթ: Կարևոր է, որ կողպեքի բանալին բարկացած և խաբված մարդկանց ձեռքում է, և այդ մարդիկ անձամբ կբացեն դուռը: Կառավարությունը ժողովրդից խլել է ազատ և համամասնական ընտրության իրավունքը»,- ասել է Մենթեշաշվիլին:
Նրա խոսքով, օրվա ընթացքում նա կրկին կփորձի կողպեք դնել պատգամավորի սենյակի դռան վրա: