Եվրոպական հանձնաժողովը հրապարակել է Եվրոպական միության ընդլայնման մասին զեկույց, որտեղ, այլ թեկնածու երկրների հետ միասին, անդրադարձ կա նաև Վրաստանին։

Զեկույցի հետ միաժամանակ Եվրահանձնաժողովը հրապարակել է մամլո հաղորդագրություն, որում նշվում է, որ 2024 թվականին ԵՄ խորհրդի եզրակացությունից հետո, ըստ որի՝ Վրաստանի եվրոինտեգրման գործընթացը փաստացի դադարեցվել է, իրավիճակը կտրուկ վատթարացել է։ Հաղորդագրության համաձայն՝ Եվրահանձնաժողովը կոչ է անում Վրաստանի իշխանություններին փոխել քաղաքական կուրսը և վերադառնալ ԵՄ-ին անդամակցելու ուղու վրա։

«2024 թվականին ԵՄ խորհուրդը եզրակացրեց, որ Վրաստանի անդամակցության գործընթացը փաստացի դադարեցվել է։ Այդ ժամանակից ի վեր իրավիճակը կտրուկ վատթարացել է. ժողովրդավարության էական նահանջ է արձանագրվել՝ իրավունքի գերակայության արագ քայքայմամբ և հիմնարար ազատությունների խիստ սահմանափակումներով։ Սա ներառում է օրենսդրություն, որը զգալիորեն սահմանափակում է քաղաքացիական տարածքը, խաթարում է արտահայտման և հավաքների ազատությունը և խախտում խտրականության արգելքի սկզբունքը։ Վրաստանի իշխանությունները պետք է անհապաղ դադարեցնեն ժողովրդավարական նահանջը և ձեռնարկեն համապարփակ, շոշափելի քայլեր չլուծված խնդիրների լուծման և հիմնական բարեփոխումների իրականացման ուղղությամբ՝ կուսակցությունների համագործակցությամբ և քաղաքացիական մասնակցությամբ՝ համաձայն ԵՄ արժեքների։ 2024 թվականի դեկտեմբերյան Եվրոպական խորհրդի եզրակացություններից հետո, հաշվի առնելով Վրաստանի նահանջը, Հանձնաժողովը Վրաստանին դիտարկում է որպես միայն անվանական թեկնածու երկիր։ Վրաստանի իշխանությունները պետք է հստակ հանձնառություն ցուցաբերեն ուղղությունը փոխելու և ԵՄ անդամակցության ուղուն վերադառնալու հարցում», – նշված է մամլո հաղորդագրությունում։

Միաժամանակ, հրապարակված մամլո հաղորդագրությունում ընդհանուր առմամբ գնահատվում է ԵՄ ընդլայնման գործընթացը։

«Այսօր Եվրահանձնաժողովը ընդունեց ընդլայնման տարեկան փաթեթը, որում ներկայացված է ընդլայնման գործընկերների կողմից վերջին տասներկու ամսում գրանցված առաջընթացի համապարփակ գնահատականը։ Այս տարվա փաթեթը ևս մեկ անգամ հաստատում է, որ ընդլայնման դինամիկան մնում է ԵՄ առաջնահերթությունների օրակարգում։ Այն նաև հաստատում է, որ նոր անդամ պետությունների միանալը գնալով ավելի իրական է դառնում», – ասված է հաղորդագրությունում։

Եվրահանձնաժողովի գնահատմամբ՝ այս առաջընթացը օգուտ է բերում ինչպես անդամակցել ցանկացող երկրներին, այնպես էլ արդեն ԵՄ անդամ պետություններին՝ նպաստելով բարեկեցությանը, ժողովրդավարությանը, անվտանգությանը և կայունությանը՝ միաժամանակ ստեղծելով նոր հնարավորություններ քաղաքացիների և բիզնեսի համար, օրինակ՝ ռազմավարական ներդրումների և միասնական շուկայի բացման տեսանկյունից։