Եվրոպայի խորհրդի խորհրդարանական վեհաժողովի (ԵԽԽՎ) նախագահ Թեոդորոս Ռուսոպուլոսը խնդրել է Վենետիկի հանձնաժողովին կարծիք պատրաստել «Օտարերկրյա ազդեցության թափանցիկության մասին» օրենքի նախագծի վերաբերյալ։ Տեղեկությունը տարածում է Վրաստանում Եվրոպայի խորհրդի գրասենյակը։

«Այս ամսվա սկզբին՝ ապրիլի 4-ին, Եվրոպայի խորհրդի խորհրդարանական վեհաժողովի (ԵԽԽՎ) Վրաստանի մոնիտորինգի հարցերով համազեկուցողներ Կլոդ Քերնը (Ֆրանսիա, ALDE – «Լիբերալների և դեմոկրատների դաշինք հանուն Եվրոպայի») և Էդիթ Էստրելլան (Պորտուգալիա, SOC – «Սոցիալիստների, դեմոկրատների և կանաչների խումբ»), խորը մտահոգություն հայտնեցին օրենքի նախագծի վերաներկայացման կապակցությամբ։

Այսպես կոչված Օտարերկրյա գործակալների մասին օրինագծի վերաներկայացումը, որի ետ կանչումը մենք ողջունել ենք, խորապես մտահոգիչ է։ Մեր հայտարարությունը, որ արել ենք, երբ մենք առաջին անգամ ներկայացրել ենք այս օրինագիծը, դեռևս ուժի մեջ է, այս օրինագիծը լուրջ հարցադրումներ է առաջացնում եվրոպական ժողովրդավարության և մարդու իրավունքների չափանիշներին ու նորմերին դրա համապատասխանության վերաբերյալ։ Ըստ այդմ՝ կոչ ենք անում կառավարությանը հանել այս օրենքի նախագիծը խորհրդարանի օրակարգից»,- ասացին համազեկուցողները։

Այսօրվա նիստի ավարտին Եվրոպայի խորհրդի խորհրդարանական վեհաժողովի մոնիտորինգի հանձնաժողովը, հաշվի առնելով մարդու իրավունքների վրա հնարավոր ազդեցությունը, որոշեց նաև խնդրել Վենետիկի հանձնաժողովի կարծիքը «Ընտանեկան արժեքների» և Վրաստանի Ընտրական օրենսգրքում գենդերային քվոտաների վերացման վերաբերյալ վերջին փոփոխությունների վերաբերյալ։ Ասված է Եվրոպայի խորհրդի գրասենյակի տարածած տեղեկատվության մեջ։