Վերջին ամիսներին Վրաստանը հաճախ է հայտնվում Եվրախորհրդարանի օրակարգում, և, ցավոք, ոչ դրական պատճառներով, – այս մասին հայտարարել է Եվրախորհրդարանի արտաքին հարաբերությունների հանձնաժողովի փոխնախագահ Հաննա Խալյոլ Մուրոն հանձնաժողովի նիստում։

«2025 թվականի փետրվարի 12-ին Եվրախորհրդարանը ընդունեց բանաձև Վրաստանում քաղաքական իրավիճակի վատթարացման վերաբերյալ՝ ընդհանուր արտաքին և անվտանգության քաղաքականության իրականացման մասին 2024 թվականի տարեկան զեկույցի շրջանակում։ Այս զեկույցը անցած շաբաթ ընդունվեց լիագումար նիստում, և մենք ևս մեկ անգամ մտահոգություն հայտնեցինք Վրաստանում ժողովրդավարական հետընթացի և բազմաթիվ բացասական իրադարձությունների կապակցությամբ։ Զեկույցում նշվում է, որ չի ճանաչվում խորհրդարանական ընտրությունների արդյունքը, և Վրաստանը ներկայացվում է որպես պետություն, որն ամբողջությամբ կլանված է «Վրացական երազանք» կուսակցության ոչ լեգիտիմ ռեժիմի կողմից։ Զեկույցը նաև մերժում է ցանկացած որոշում, որը կայացվում է այդ կառույցի կողմից, որը ձգտում է վերահսկել երկիրը։

Ապրիլի 2-ին ԵՄ Բարձր ներկայացուցիչ Կայա Կալլասը և ԵՄ-ի ընդլայնման հարցերով հանձնակատար Մարթա Կոսան հրապարակեցին համատեղ հայտարարություն նոր օրենսդրության վերաբերյալ, ներառյալ «օտարերկրյա գործակալների գրանցման մասին» ակտն ու հեռարձակման մասին օրենքը, որոնք ընդունվել են առանց համապատասխան հանրային խորհրդակցությունների։ Այս օրենսդրությունը Վրաստանի իշխանություններին տալիս է լրացուցիչ գործիքներ՝ այլախոհության ճնշման և ռեպրեսիվ քաղաքականության ուժեղացման համար», – նշել է Հաննա Խալյոլ Մուրոն։

Նրա խոսքով՝ «Չնայած դրան, Վրաստանում շարունակվում է քաղաքացիական բողոքը իշխանությունների վերջին որոշումների դեմ, որոնք առնչվում են ԵՄ-ին ինտեգրման դադարեցման գործընթացին»։