Եվրամիության դիտորդական առաքելության նոր ղեկավար Բետինա Պատրիսիա Բուգանին իր պարտականություններն է սկսել Վրաստանում։

Եվրամիության դիտորդական առաքելության հաղորդմամբ, Բուգանին Թբիլիսի է ժամանել ապրիլի 6-ին։

«Ուրախ եմ, որ պատիվ ունեմ սկսելու իմ աշխատանքը որպես Եվրամիության դիտորդական առաքելության ղեկավար։ Իմ մասնագիտական ​​կարիերայի ավելի քան 35 տարիների ընթացքում ես առաջնորդվել եմ անվտանգության, խաղաղության և կայունության խթանման հանձնառությամբ: Պատիվ կլինի ղեկավարել ավելի քան 300 եռանդուն աշխատակիցների թիմը, ովքեր 24/7 գրաֆիկով քրտնաջան աշխատում են, նպաստելու Վրաստանի կայունությանը և անվտանգությանը: Հուսով եմ, որ իմ ղեկավարությունը կօգնի նրանց այս կարևոր առաքելության մեջ, որն օգնում է բարելավել հակամարտությունից տուժած բնակչության առօրյան և վերականգնել վստահությունը համայնքների միջև»,- ասել է առաքելության ղեկավարը Վրաստան ժամանելուն պես։

Բետինա Բուգանին Եվրամիության խորհրդի կողմից նշանակվել է ղեկավարի պաշտոնում 2024 թվականի մարտի 26-ին, իսկ իր պարտականությունները սկսել է կատարել 2024 թվականի ապրիլի 1-ից։

Ըստ Եվրամիության դիտորդական առաքելության, Բետինա Պատրիսիա Բուգանին Ֆրանսիայի ազգային ժանդարմերիայի սպա է և ունի մեծ փորձ ղեկավար պաշտոններում և միջազգային հարաբերություններում։ Նա տարբեր բարձր պաշտոններ է զբաղեցրել ՄԱԿ-ում և Ֆրանսիայի ներքին գործերի նախարարությունում/Ֆրանսիայի ժանդարմերիայում։ Մինչ այդ նա զբաղվում էր խաղաղապահ գործունեությամբ՝ ծառայելով որպես ոստիկանության հանձնակատար MINUSMA-ում (Մալիում ՄԱԿ-ի բազմաչափ ինտեգրված կայունացման առաքելություն):