Վրաստանի վարչապետ Գիորգի Գախարիան Վրաստանում այցով գտնվող Հայաստանի Հանրապետության վարչապետ Նիկոլ Փաշինյանի հետ ընդլայնված հանդիպման ընթացքում խոսել է տարածաշրջանում ժողովրդավարական զարգացման և կայունության կարևորության մասին:

Ըստ Գախարիայի, հենց տարածաշրջանում ժողովրդավարական զարգացումն ու կայունությունն է, որոնք հիմք են հանդիսանում հետագա զարգացման համար ինչպես տնտեսական, այնպես էլ մշակութային և կրթական ոլորտներում:

«Մեր ծրագիրը արդյունքն է – մենք խոսում ենք այն բոլոր հարցերի մասին, որոնք արդեն քննարկել ենք Երևան կատարած այցի ընթացքում: Այնուհետև մենք կքննարկենք նոր հարցեր, որոնք կարևոր են ինչպես վրացական, այնպես էլ հայկական կողմերի համար: Ես կցանկանայի առանձնացնել որոշ հարցեր: Ինչպես ասացիք, մեր երկրների համար շատ կարևոր է ժողովրդավարական զարգացումը և, իհարկե, կայունությունը տարածաշրջանում: Սա հիմքն է հետագա զարգացման համար, տնտեսական, մշակութային և կրթական ոլորտներում և ես ուրախ եմ, որ մենք աջակցում ենք տարածաշրջանում հակամարտությունների խաղաղ կարգավորմանը»,- ասել է Գիորգի Գախարիան:

Վարչապետի խոսքով, Վրաստանի վճռական որոշումն է՝ եվրոատլանտյան ինտեգրումն ու ժողովրդավարական զարգացման հետագա խորացումը:

Նիկոլ Փաշինյանը Վրաստանում է գտնվում պատվիրակության հետ միասին: Նա պաշտոնական այցով Վրաստանում է գտնվում երկրորդ անգամ: Թբիլիսիի միջազգային օդանավակայանում նրան դիմավորել է Վրաստանի արտգործնախարար Դավիթ Զալկալիանին :