Երրորդ երկրների այն քաղաքացիները, ովքեր չունեն Լատվիայում տրված վիզա կամ կեցության թույլտվություն, պարտավոր կլինեն երկիր մուտք գործելուց առաջ ներկայացնել տեղեկատվություն վտանգի կանխարգելման համակարգում։ Այս մասին տեղեկությունը տարածել է Լատվիայի դեսպանությունը Վրաստանում՝ սոցիալական ցանցի միջոցով։

Դեսպանության հաղորդմամբ՝ տվյալների ներկայացման նոր կարգը ուժի մեջ կմտնի 2025 թվականի սեպտեմբերի 1-ից։

«Պետական անվտանգության ամրապնդման և պետական սահմանի պաշտպանության արդյունավետության բարձրացման նպատակով 2025 թվականի սեպտեմբերի 1-ից երրորդ երկրների այն քաղաքացիները, ովքեր չունեն Լատվիայում տրված վիզա կամ կեցության թույլտվություն, պարտավոր կլինեն Լատվիա մուտք գործելուց առաջ պետական վտանգի կանխարգելման տեղեկատվական համակարգում (eta.gov.lv) ներկայացնել տվյալներ իրենց, իրենց հարազատների (եթե այդպիսիք կան) և ճանապարհորդության նպատակի մասին։

Ներգաղթի մասին օրենքում համապատասխան փոփոխությունները ընդունվել են Սեյմի կողմից 2025 թվականի ապրիլի 3-ին։

Տեղեկատվության տրամադրման պարտավորություն ունեցող անձանց շրջանակը հստակ սահմանված է Ներգաղթի մասին օրենքի 4.4-րդ հոդվածի առաջին կետում՝ օտարերկրացիներ, ովքեր չեն հանդիսանում Եվրամիության, Հյուսիսատլանտյան պայմանագրի կազմակերպության (ՆԱՏՕ), Տնտեսական համագործակցության և զարգացման կազմակերպության, Եվրոպական տնտեսական գոտու անդամ պետության, Շվեյցարիայի Համադաշնության կամ Բրազիլիայի Դաշնային Հանրապետության քաղաքացիներ և չունեն Լատվիայի Հանրապետության կողմից տրված վիզա կամ կեցության թույլտվություն, պարտավոր կլինեն տրամադրել տվյալներ։ Այս պարտավորությունը տարածվում է նաև այն անձանց վրա, ովքեր միայն Լատվիայի տարածքով անցնում են տարանցիկ կերպով։

Լատվիա ժամանումից առնվազն 48 ժամ առաջ տվյալները պետք է ներկայացվեն առցանց՝ eta.gov.lv կայքում։ Տվյալների ներկայացումից հետո անձը նշված էլեկտրոնային հասցեին կստանա ավտոմատ հաստատում տվյալների ընդունման վերաբերյալ։ Լատվիա մուտք գործելու համար առանձին թույլտվության սպասել անհրաժեշտ չէ», – նշված է Լատվիայի դեսպանության հաղորդագրությունում։