Ուկրաինայի նախագահ Վլադիմիր Զելենսկին ԱՄՆ-ի նախագահին գոլֆի գավազան է նվիրել՝ Սպիտակ տանը երեկ կայացած հանդիպման ժամանակ։ Գավազանը նրան փոխանցել է ուկրաինացի զինվորական, Ուկրաինայի զինված ուժերի կրտսեր սերժանտ Կոնստանտին Կարտավցևը։ Այս մասին հայտնում է Ուկրաինայի նախագահի գրասենյակը։

Զելենսկին Դոնալդ Թրամփին պատմել է, որ Կարտավցևը ոտքը կորցրել է Ռուսաստանի լայնածավալ ներխուժման առաջին ամիսներին՝ մարտընկերների կյանքը փրկելիս։

Նախագահի խոսքով՝ գոլֆը դարձել է կրտսեր սերժանտի վերականգնման մաս։

Նախագահի գրասենյակի տվյալներով՝ Զելենսկին Թրամփին ցույց է տվել նաև Կարտավցևի տեսաուղերձը, որում ուկրաինացի զինվորականը խնդրում է ԱՄՆ-ի նախագահին օգնել, որպեսզի պատերազմն Ուկրաինայում ավարտվի արդար և կայուն խաղաղությամբ։

Նախագահ Թրամփը ընդունել է նվերը և որպես պատասխան տեսանյութ է նկարահանել, որում շնորհակալություն է հայտնում ուկրաինացի զինվորին։

Իր հերթին Դոնալդ Թրամփը Ուկրաինայի նախագահին նվիրել է Սպիտակ տան խորհրդանշական բանալին։