Մենք լիովին աջակցում ենք Վրաստանի տարածքային ամբողջականությանը, Աբխազիան և Հարավային Օսիան Վրաստանի մաս են կազմում, հայտարարել է ՆԱՏՕ-ի գլխավոր քարտուղար Ենս Ստոլտենբերգը Վրաստանի վարչապետ Իրակլի Կոբախիձեի հետ համատեղ ասուլիսի ժամանակ։

Ստոլտենբերգի խոսքով՝ Վրաստանը ՆԱՏՕ-ի ամենամոտ գործընկերներից է։

«Պարոն վարչապետ, ուրախ եմ ձեզ կրկին տեսնելու համար։ Լավ է հիմա այստեղ լինել: Սա ցույց է տալիս, թե որքան արժեքավոր է մեզ համար Վրաստան-ՆԱՏՕ գործընկերությունը, և մենք ողջունում ենք այն փաստը, որ դուք Բրյուսելում էիք մի քանի շաբաթ առաջ, իսկ հիմա ես այստեղ եմ, այս ամենը վկայում է այն մասին, որ մեր միջև ակտիվ քաղաքական երկխոսություն կա։ Վրաստանը ՆԱՏՕ-ի ամենամոտ գործընկերներից է, և մենք բարձր ենք գնահատում Վրաստանի ներդրումը ՆԱՏՕ-ի առաքելություններում և գործողություններում: Մենք լիովին աջակցում ենք Վրաստանի տարածքային ամբողջականությանը։ Աբխազիան և Հարավային Օսիան Վրաստանի մաս են կազմում։ ՆԱՏՕ-ն շարունակում է կոչ անել Ռուսաստանին հետ կանչել Վրաստանի օկուպացված տարածքները որպես անկախ պետություններ ճանաչելու որոշումը։ Վրաստանի և Ուկրաինայի օկուպացված տարածքներում Ռուսաստանի կողմից կազմակերպված ընտրությունների անցկացումը լիովին անօրինական է, և Ռուսաստանի նախագահական ընտրությունները միանշանակ ոչ ազատ են եղել, ոչ թափանցիկ»,- ասել է Ստոլտենբերգը։