ԵԱՀԿ խորհրդարանական վեհաժողովը Պորտուի հռչակագրով կոչ է անում Սիրիայի կառավարությանը չեղարկել Վրաստանի շրջանների՝ Աբխազիայի և Ցխինվալի, ինչպես նաև Ուկրաինայի Դոնեցկի և Լուգանսկի շրջանների «անկախության» ճանաչումը և ճանաչել Վրաստանի և Ուկրաինայի տարածքային ամբողջականությունը։

Հռչակագրի համաձայն՝ «վեհաժողովը մերժում է ցանկացած փորձ՝ լեգիտիմություն տալու Ռուսաստանի Դաշնության վերահսկողության տակ գտնվող Վրաստանի օկուպացված շրջաններում անցկացված «ընտրություններին», ներառյալ 2025 թվականի մարտի 2-ին Աբխազիայում անցկացված «նախագահական ընտրությունները», որոնք չեն ճանաչվել միջազգային իրավունքի կողմից և ուղղակի մարտահրավեր են Վրաստանի ինքնիշխանությանն ու տարածքային ամբողջականությանը»։

Պորտուի հռչակագրում նաև նշվում է, որ «ԵԱՀԿ խորհրդարանական վեհաժողովը խոր մտահոգություն է հայտնում Ռուսաստանի Դաշնության կողմից 2008 թվականից սկսած Վրաստանի Աբխազիայի և Ցխինվալի շրջանների օկուպացիայի կապակցությամբ, ինչը խարխլում է տարածաշրջանային անվտանգությունը, և կոչ է անում լիարժեք իրականացնել Եվրամիության միջնորդությամբ ձեռք բերված հրադադարի համաձայնագիրը, այդ թվում՝ Ռուսաստանի Դաշնության զինված ուժերի անհապաղ դուրսբերումը մինչպատերազմյան դիրքեր, մարդասիրական օգնության անխափան մուտքի ապահովումը տուժած շրջաններ, տեղահանված անձանց և փախստականների անվտանգ և արժանապատիվ վերադարձի իրականացում և կառուցողական ներգրավում Ժնևյան բանակցություններում»։

Պորտուի հռչակագրում առանձին գլուխ է նվիրված Վրաստանի վերաբերյալ բանաձևին։