«Գիրչի» կուսակցության ղեկավարներից մեկը՝ Յագո Խվիճիան, հայտարարել է, որ Ալեկո Էլիսաշվիլիի դեպքը քաղաքականության հետ կապ չունի, այլ, հակառակը՝ կապված է «քաղաքականության սպանության» հետ։ Նրա խոսքով՝ հարբածության պահը կարող է մարդուն տարբեր բաներ անել տալ։

Նրա խոսքով՝ դեպքի վերաբերյալ ինքը երեք վարկած ունի։

«Առաջին՝ պարոն Ալեկո Էլիսաշվիլին հարբել է և հիշել է դատարանի մեղքերը վրաց ժողովրդի առաջ ու «ճիշտ ընկերական վրացական ոճով» փորձել է դատարանը այրել։ Թե ինչ կապ ուներ կանցլարիայի շենքը, այդքան էլ պարզ չէ։ Ինչպես փաստաբանի հայտարարություններից երևում է՝ նա կարծես թե այսօր էլ ծանր «փախմելիայի» մեջ է։ Երկրորդ վարկածը՝ հնարավոր է ինչ-որ մեկը նրան շանտաժի է ենթարկել և ստիպել նման հիմար քայլ անել, որպեսզի հետագայում, ինչպես այսօր պարոն Շալվա Պապուաշվիլին մեղադրեց Եվրոպական միությանը դատարանում ահաբեկչական գործողություն նախապատրաստելու մեջ, նույն նպատակով օգտագործեն։ Երրորդ վարկածը՝ ռադիկալ ընդդիմության դիրքը այս պահին թափուր է, և մեր քաղաքական գործիչները, թեկուզ տարօրինակ պայքարի ձևով, մրցում են այդ դիրքի համար։ Չորրորդ վարկած չունեմ։ Ես հակված եմ առաջինին՝ հարբած «փախմելիայի» վարկածին։ Մնացածի մասին դեռևս տեղեկատվություն չունեմ։ Սա ոչ մի կապ չունի քաղաքականության հետ։ Ընդհակառակը՝ կապված է քաղաքականության սպանության հետ։ Բայց, հասկանում եք, հարբած մարդը ամեն ինչի ընդունակ է», – նշել է Յագո Խվիճիան։

Հիշեցնենք, որ Ներքին գործերի նախարարության տարածած տեղեկատվության համաձայն՝ կալանավորվել է «Ուժեղ Վրաստան – Լելո» կոալիցիայի առաջնորդներից Ալեկո Էլիսաշվիլին, որը այսօր առավոտյան փորձել է այրել Թբիլիսիի քաղաքային դատարանի կանցլարիայի շենքը։

Փաստաբան Գիորգի Ռեխվիաշվիլու հայտարարությամբ՝ Ալեկո Էլիսաշվիլին ափսոսում է, որ գործը մինչև վերջ չի հասցրել, սակայն գործողությունը դիտարկել է որպես գիտակցված բողոքի ձև։