Վրաստանի խորհրդարանը հրապարակել է «2003–2012 թթ․ գործող ռեժիմի, այդ ռեժիմի քաղաքական պաշտոնյաների և քաղաքական կուսակցություններում ընդգրկված գործող ու նախկին պաշտոնյաների 2003 թվականից մինչ օրս գործունեության ուսումնասիրության Վրաստանի խորհրդարանի ժամանակավոր քննիչ հանձնաժողովի» եզրակացությունը և համապատասխան որոշումը։

Հանձնաժողովի եզրակացությունը պարունակում է մոտ 500 էջ։ Ինչպես նշված է խորհրդարանի տարածած հաղորդագրությունում, հաշվետվությունում գնահատված է 2003–2012 թթ․ գործող ռեժիմի, այդ ռեժիմի քաղաքական պաշտոնյաների և քաղաքական կուսակցություններում ընդգրկված նախկին ու ներկա պաշտոնյաների գործունեությունը՝ սկսած 2003 թվականից մինչև օրս։

Խորհրդարանի տվյալներով՝ քննիչ հանձնաժողովի եզրակացության մեջ վերլուծված փաստերի հիման վրա խորհրդարանը եզրակացրել է, որ տեղի են ունեցել հետևյալ դեպքերը՝

• «Ազգային շարժման» ռեժիմի կողմից իրականացված խոշտանգումներ և անմարդկային վերաբերմունք։

• «Ազգային շարժման» ներկայացուցիչների կողմից կատարված սպանություններ և բռնություն, անձնական կյանքի անձեռնմխելիության խախտում։

• Կոռուպցիա, բիզնեսի ռեկետ և սեփականության իրավունքի կոպիտ խախտումներ։

• Մեդիայի ազատության դեմ գործողություններ։

• Վրաստանի տարածքային ամբողջականության և խաղաղության գործընթացների դեմ գործողություններ։

• Միխեիլ Սաակաշվիլիի, «Ազգային շարժման» և նրանց հետ առնչվող անձանց ապակառուցողական գործունեությունը 2012–2025 թթ․։