Վրաստանի վարչապետը հանդիպել է Թուրքմենստանի նախագահին
Վրաստանի վարչապետ Իրակլի Կոբախիձեն հանդիպել է Թուրքմենստանի նախագահ Սերդար Բերդիմուհամեդովին։
Կառավարության աշխատակազմի տեղեկությամբ՝ առանձնազրույցի ընթացքում խոսվել է Վրաստանի և Թուրքմենստանի միջև տարբեր ոլորտներում համագործակցության զարգացման դրական դինամիկայի մասին։ Կողմերը վերահաստատել են իրենց պատրաստակամությունը՝ հետագայում ևս խորացնելու հարաբերությունները քաղաքական, առևտրատնտեսական, մշակութային և հումանիտար ուղղություններով։
Նրանց հաղորդմամբ՝ ուշադրություն է դարձվել նաև տրանսպորտային և էներգետիկ ոլորտներում համագործակցությանը։ Այս համատեքստում ընդգծվել է կապուղիների և «Միջին միջանցքի» առանձնահատուկ նշանակությունը։ Առաջնորդները պատրաստակամություն են հայտնել նպաստելու Տրանսկասպյան տրանսպորտային երթուղու հետագա զարգացմանը։
Թուրքմենական կողմը հետաքրքրություն է հայտնել տարբեր ոլորտներում Վրաստանի հաջողված փորձի կիսման հարցում։
Հանդիպման ընթացքում շեշտվել է նաև խաղաղության և կայունության կարևորությունը տարածաշրջանային զարգացման ու բարօրության համար։