Ներքին գործերի նախարարության Սահմանապահ ոստիկանության աշխատակիցները, Կենտրոնական քրեական ոստիկանության վարչության աշխատակիցների հետ համատեղ իրականացված համալիր օպերատիվ միջոցառումների և քննչական գործողությունների արդյունքում, Հայաստանի մեկ քաղաքացու՝ 1979 թվականին ծնված Ջ.Ե.-ի և երկու օտարերկրյա քաղաքացիների՝ 1989 թվականին ծնված Ն.Մ.-ի և 1999 թվականին ծնված Վ.Ի.-ի, ձերբակալել են՝ կազմակերպված խմբի կողմից միգրանտի անօրինական տեղափոխման նախապատրաստման փաստով։ Տեղեկությունը տարածում է ՆԳՆ-ն։

Նախարարության տվյալներով՝ հանցագործությունը նախատեսում է ազատազրկում 8-ից 15 տարվա ժամկետով։

«Հետաքննությամբ պարզվել է, որ Ջ.Ե.-ն, Ն.Մ.-ն և Վ.Ի.-ն կազմակերպված խմբով նախապատրաստել են Սարփի սահմանային-անցակետի միջոցով (թաքնված ձևով, բեռնատար ավտոմեքենայով) միգրանտին Վրաստանից Թուրքիա տեղափոխելու գործընթացը, որի դիմաց նրանք ստացել են մեծ գումար»։

Սահմանապահ ոստիկանության աշխատակիցները, դատարանի որոշման հիման վրա, իրականացրել են վերահսկվող գնում՝ մեղադրյալներին միգրանտի անօրինական տեղափոխման համար գումարի փոխանցման պահին, ինչպես նաև փաստի գաղտնի աուդիո-վիդեո ձայնագրում։

Իրավապահները մեղադրյալների անձնական և ավտոմեքենայի խուզարկության արդյունքում որպես ապացույց առգրավել են վերահսկվող գնումի ժամանակ փոխանցված մեծ գումարը։

Հետաքննությունը տարվում է Վրաստանի Քրեական օրենսգրքի 18-344¹ հոդվածի 3-րդ մասի «ա» կետով։