Վրաստանի պաշտպանության նախարարը հանդիպել է ադրբեջանցի և թուրք գործընկերների հետ
Վրաստանի պաշտպանության նախարար Ջուանշեր Բուրճուլաձեն Թուրքիայում մասնակցել է Ադրբեջան-Թուրքիա-Վրաստան եռակողմ պաշտպանության նախարարների հանդիպմանը։
Վրաստանի ՊՆ տեղեկատվության համաձայն՝ երկկողմ հանդիպումներից հետո Ջուանշեր Բուրճուլաձեն եռակողմ ձևաչափով հանդիպել է Թուրքիայի պաշտպանության նախարար Հուլուսի Աքարի և Ադրբեջանի պաշտպանության նախարար, գեներալ-գնդապետ Զաքիր Հասանովի հետ։
«Կողմերը քննարկել են ավելի լայն սևծովյան տարածաշրջանի անվտանգության միջավայրը և ժամանակակից մարտահրավերները, ինչպես նաև Ուկրաինայում ընթացիկ իրադարձությունները։ Եռակողմ նախարարական հանդիպմանը ուշադրություն է դարձվել նաև էներգետիկ անվտանգության ամրապնդման և էներգակիրների մատակարարման ուղիների դիվերսիֆիկացման կարևորությանը։
Ադրբեջան-Թուրքիա-Վրաստան պաշտպանության մինիստերիալին կողմերը խոսել են պաշտպանության ոլորտում առկա համագործակցության և ապագա ծրագրերի մասին։ Ջուանշեր Բուրճուլաձեն նշել է, որ համատեղ զորավարժություններն ու վարժանքները, փորձագիտական մակարդակով հանդիպումներն էլ ավելի են մերձեցնում երեք երկրների զինվորականներին և ամրապնդում փոխհամատեղելիությունը։
Ջուանշեր Բուրճուլաձեն ասել է, որ գերատեսչությունը շարունակում է բարեփոխել և զարգացնել պաշտպանական համակարգը, աշխատում է մարտունակության բարձրացման, ինստիտուցիոնալ միջավայրի բարելավման և այլ հիմնական ուղղություններով։
Հանդիպման ավարտին պաշտպանության նախարարները ստորագրել են եռակողմ մինիստերիալի կոմյունիկեն։ Ադրբեջան-Թուրքիա-Վրաստան պաշտպանության նախարարների եռակողմ հանդիպումը այս տարի կայացել է թուրքական կողմի հյուրընկալությամբ Կայսեր քաղաքում»,- նշվում է Վրաստանի պաշտպանության նախարարության հաղորդագրության մեջ։