Վրաստանի և Ադրբեջանի Հանրապետության Ներքին գործերի նախարարությունների միջև ստորագրվել է համագործակցության վերաբերյալ համաձայնագիր, որը ստորագրել են Վրաստանի ՆԳ նախարար Գեկա Գելաձեն և Ադրբեջանի ՆԳ նախարար Վիլայաթ Էյվազովը։

Համաձայնագիրը կնպաստի երկու երկրների համապատասխան կառույցների միջև առկա գործընկերության հետագա ամրապնդմանը՝ հատկապես հանցավորության կանխարգելման, բացահայտման և կանխման ոլորտներում։

Փաստաթղթով նախատեսված համագործակցության ոլորտները ներառում են առաջնահերթ ուղղություններ՝ թմրամիջոցների անօրինական շրջանառություն, կիբերհանցագործություն, թրաֆիքինգ, անօրինական միգրացիա և սեփականության դեմ ուղղված հանցագործություններ։

Բացի այդ, կողմերի միջև կայացել է ընդլայնված ձևաչափով երկկողմ հանդիպում, որի ընթացքում քննարկվել են ոլորտային բարեփոխումներ, ընթացիկ նախագծեր և ոստիկանության համագործակցության շրջանակում տեղեկատվության ու փորձի փոխանակման կարևորությունը։

Նախարարները ևս մեկ անգամ ընդգծել են առկա արդյունավետ համագործակցությունն ու արտահայտել պատրաստակամություն՝ առավել խորացնելու կապերը։

Այս մասին տեղեկացնում է Վրաստանի Ներքին գործերի նախարարությունը։