Ուրսուլա ֆոն դեր Լայեն․ Աշխարհը ականատես է լինում այն գնին, որը մենք վճարում ենք՝ կլիմայի և էներգետիկ անվտանգության հարցերում հին կարգը պահպանելու համար․ մենք շրջադարձային կետում ենք, և Եվրոպան կկատարի իր դերը
Ըստ Եվրոպական հանձնաժողովի նախագահ Ուրսուլա ֆոն դեր Լայենի՝ անցած ամառը դարձավ «ճշմարտության ամառ»՝ կլիմայական իրականության տեսանկյունից։ Այս մասին ֆոն դեր Լայենը նշել է COP31 գագաթնաժողովում ունեցած իր ելույթի ժամանակ։
Եվրոպական հանձնաժողովի նախագահն անդրադարձել է կլիմայական գլոբալ ճգնաժամին, էներգետիկ անվտանգությանը և Եվրոպայի երեք հիմնական առաջնահերթություններին։
«Աշխարհը տեսնում է այն գինը, որը մենք վճարում ենք՝ կլիմայի և էներգետիկ անվտանգության հարցերում հին կարգերը պահպանելու համար։ Մենք գտնվում ենք գլոբալ շրջադարձային կետում, ուստի պետք է կրկնապատկենք մեր ջանքերը, և Եվրոպան կկատարի իր դերը», — հայտարարել է Ուրսուլա ֆոն դեր Լայենը։
Նա նշել է, որ Եվրոպական միությունը նախատեսում է մինչև 2030 թվականը կրճատել արտանետումները ավելի քան 50%-ով, իսկ մինչև 2040 թվականը՝ 90%-ով։ Սա առանցքային նախապայման է՝ մինչև 2050 թվականը առաջին կլիմայական չեզոք մայրցամաքը դառնալու համար։ Ֆոն դեր Լայենն աջակցություն է հայտնել «35/35» գլոբալ նախաձեռնությանը, որի նպատակն է ամրապնդել էներգետիկ անվտանգությունը և նվազեցնել սպառողների ծախսերը։ Նա նշել է, որ Եվրոպական միությունում էլեկտրաէներգիայի ավելի քան 70%-ն արդեն իսկ ստացվում է մաքուր աղբյուրներից, և հետագա ծրագրերը նպատակ ունեն էլ ավելի մեծացնել այդ ցուցանիշը։
Ֆոն դեր Լայենը հայտարարել է, որ Եվրոպան շարունակում է մնալ կլիմայական ֆինանսավորման ամենախոշոր դոնորը։
«Անցյալ տարի Միությունը զարգացող երկրներին աջակցելու համար հատկացրել է ավելի քան 32 միլիարդ եվրո, իսկ «Գլոբալ դարպաս» (Global Gateway) նախաձեռնության շրջանակներում կայուն ներդրումների ծավալը գերազանցել է 300 միլիարդ եվրոն», — նշել է Եվրոպական հանձնաժողովի նախագահը։
Իր խոսքի ավարտին Ուրսուլա ֆոն դեր Լայենն ընդգծել է, որ, չնայած գիտական մռայլ կանխատեսումներին, մարդկության ապագան կախված է հավաքական ջանքերից, և Եվրոպան պատրաստ է գործել համատեղ՝ իր գլոբալ գործընկերների հետ միասին։