Ուկրաինայի նախագահ Վոլոդիմիր Զելենսկին այսօր Բեռլինում կհանդիպի ամերիկացի պաշտոնյաների հետ: Այս մասին գրել է ինքը Վոլոդիմիր Զելենսկին։

Ուկրաինայի նախագահը հայտարարել է, որ ստացել է բոլոր անհրաժեշտ ազդանշանները ԱՄՆ խաղաղության ծրագրի վերջին առաջարկների վերաբերյալ և պատրաստ է երկխոսության, «որը կսկսվի այսօր»։

«Այսօր Բեռլինում ուկրաինական-ամերիկյան օր է։ Իհարկե, ես առանձին կհանդիպեմ կանցլեր Մերցի հետ, և, ամենայն հավանականությամբ, այսօր երեկոյան կրկին կհանդիպեմ նրա հետ մեր որոշ եվրոպացի առաջնորդների հետ միասին», – ասել է Զելենսկին Բեռլին մեկնելիս։

Բացի այդ, Զելենսկին նշել է, որ որոշ եվրոպացի գործընկերներ չեն աջակցել Ուկրաինայի անդամակցությանը ՆԱՏՕ-ին՝ որպես անվտանգության երաշխիք։ Նրա խոսքով, Ուկրաինայի ցանկությունն ի սկզբանե եղել է անդամակցել ՆԱՏՕ-ին, և սա անվտանգության իրական երաշխիք է։

«Որոշ գործընկերներ, թե՛ Միացյալ Նահանգները, թե՛ Եվրոպան, չաջակցեցին այս մոտեցմանը: Հետևաբար, այսօր Ուկրաինայի և Միացյալ Նահանգների միջև երկկողմանի անվտանգության երաշխիքները, մասնավորապես՝ Միացյալ Նահանգների կողմից մեզ համար 5-րդ հոդվածի նման երաշխիքները և մեր եվրոպացի գործընկերների, ինչպես նաև այլ երկրների, ինչպիսիք են Կանադան, Ճապոնիան և այլն, անվտանգության երաշխիքները, մեզ համար հնարավորություն են՝ կանխելու ռուսական ագրեսիայի ևս մեկ ալիք», – նշել է Զելենսկին։

Ըստ Ուկրաինայի նախագահի՝ սա արդեն իսկ փոխզիջում է Ուկրաինայի կողմից։

Լրատվամիջոցների հաղորդագրությունների համաձայն՝ ԱՄՆ ներկայացուցիչները այսօր առավոտյան ժամանել են Բեռլին: Ավելի վաղ Wall Street Journal-ը հայտնել էր, որ Սթիվ Վիտկոֆը կժամանի Բեռլին՝ բանակցությունների համար։