Վոլոդիմիր Զելենսկի. Ուկրաինայի և Եվրոպայի համար ողբերգություն կլինի, եթե մենք ստիպված լինենք գոյատևել առանց ԱՄՆ-ի լրացուցիչ օգնության, մեզ հեռահար զենք է անհրաժեշտ
Ուկրաինայի նախագահ Վոլոդիմիր Զելենսկու խոսքով՝ Ուկրաինայի և Եվրոպայի համար ողբերգություն կլինի, եթե նրա երկիրը ստիպված լինի գոյատևել առանց Ամերիկայի Միացյալ Նահանգների լրացուցիչ օգնության։ Այս մասին նա հայտարարել է Fox News-ին տված հարցազրույցում։
«Կարո՞ղ են ուկրաինացիները գոյատևել առանց Կոնգրեսի աջակցության : Իհարկե, բայց ոչ բոլորս։ Եթե մենք հասկանանք արժեքը, և եթե աշխարհը պատրաստ է դրան, ապա լավ, դուք դա կտեսնեք, բայց դա ողբերգություն է։ Դա ողբերգություն կլինի բոլորիս համար, ոչ միայն Ուկրաինայի ու ուկրաինացիների, այլ ողջ Եվրոպայի համար»,- ասել է Ուկրաինայի նախագահը։
Ըստ Զելենսկու՝ Պուտինը երբեք կանգ չի առնի և կգնա Արևելյան Եվրոպայի ճանապարհով, քանի որ դա ինքն է ուզում։
«Մեզ հեռահար զենքեր են պետք։ Այդ մասին երեկ զրուցել ենք կոնգրեսականների հետ։ Ես խոսել եմ նաև նախագահ Բայդենի հետ։ Սա հասկանում են բոլորը։ 300 կիլոմետր հեռավորության վրա գործող ATACMS հրթիռները մեզ շատ կօգնեն»,- ասել է Զելենսկին։
ԱՄՆ Սենատն ընդունել է 95 միլիարդ դոլար արժողությամբ օգնության փաթեթը, որը ներառում է օգնություն Ուկրաինային, սակայն Ներկայացուցիչների պալատի խոսնակ Մայք Ջոնսոնն ասել է, որ Կոնգրեսը չի հաստատի այն: