Վոլոդիմիր Զելենսկի. Ռուսաստանն ավելացնում է իր բանակը 100.000-ով, Վլադիմիր Պուտինն ընդհանրապես չի պատրաստվում բանակցությունների, նա պատրաստվում է շարունակել պատերազմը
Ուկրաինայի նախագահ Վոլոդիմիր Զելենսկին հայտարարել է, որ Ռուսաստանն ավելացնում է իր բանակը 100 հազարով։ Այս մասին Զելենսկին ասել է իր ամենօրյա ուղերձում։
Նրա խոսքով՝ Վլադիմիր Պուտինն ամենևին էլ չի պատրաստվում բանակցությունների և խաղաղության, այլ ավելի շուտ պատրաստվում է շարունակել պատերազմը։
Ուկրաինայի նախագահը ողջունել է նաև ՆԱՏՕ-ի ռազմական կոմիտեի նոր նախագահի այցը Ուկրաինա։
«Մենք գնահատում ենք, որ ՆԱՏՕ-ի ռազմական կոմիտեի նոր ղեկավարի առաջին այցը տեղի է ունեցել հենց մեր երկրում՝ ի աջակցություն ուկրաինացիների։ Մենք քննարկեցինք Ռամշտայնի նախապատրաստական աշխատանքները և պաշտպանական մեր ընդհանուր կարիքները: Հիմա մենք գիտենք, մեր հետախուզությունն ասում է, որ ռուսները նոր դիվիզիաներ են ստեղծում, նոր ռազմական արտադրություն են զարգացնում։ Հասկանալի է, որ Հյուսիսային Կորեայի հետ նրանց համագործակցությունը նույնպես ավելի կընդլայնվի։ Ցավոք, Մոսկվան այդ տարածաշրջանում տարածում է նաև պատերազմի ժամանակակից տեխնոլոգիաներ, մասնավորապես՝ անօդաչու թռչող սարքերի տեխնոլոգիաներ։ Սա նշանակում է մի պարզ բան՝ Պուտինը ամենևին էլ չի պատրաստվում բանակցությունների և խաղաղության, այլ պատրաստվում է շարունակել պատերազմը և ոչ միայն Ուկրաինայի դեմ։ Նրանք այժմ իրենց բանակն ավելացնում են ավելի քան 100 հազար զինվորով։ Բոլոր գործընկերները պետք է իմանան այս մասին և տեսնեն սա: Մենք պատրաստ ենք համապատասխան տեղեկատվություն տրամադրել, և հետախուզական գծով արդեն իսկ իրականացվում է համապատասխան հաղորդակցություն»,- ասել է Զելենսկին։
Զելենսկու խոսքով՝ Ուկրաինան և նրա գործընկերները պետք է հստակ տեսնեն սպառնալիքներն ու դրանց հակազդելու գործիքները։
«Անհրաժեշտ է հստակ հասկանալ. այստեղ՝ Եվրոպայում, յուրաքանչյուր երկիր պետք է ուժեղացնի պաշտպանությունը, և պաշտպանության ծախսերում ՀՆԱ-ի 5%-ի նպատակը չի անհետանա օրակարգից»,- ասել է Զելենսկին։