Վոլոդիմիր Զելենսկի. Մենք կվերադառնանք Ղրիմ, ամեն ինչ սկսվեց և կավարտվի այնտեղ

Կվերադառնանք Ղրիմ,- այս մասին հայտարարել է Ուկրաինայի նախագահը «Ղրիմի հարթակում» ունեցած ելույթի ժամանակ։ Նրա խոսքով, Ռուսաստանի կողմից բռնակցված Ղրիմն անպայման կվերադառնա Ուկրաինային և կառավարությունը կուղղի այն ամենը, ինչ արել է Ռուսաստանը թերակղզում և ընդհանրապես սևծովյան տարածաշրջանում։

«Ռուսական սպառազինության հետ մեկտեղ թերակղզին բախվեց բնապահպանական լուրջ սպառնալիքների, քանի որ տեղի ունեցավ բնության աննախադեպ ոչնչացում, ավերվեց նաև քաղաքացիների սոցիալական կյանքը, փլուզվեց տնտեսությունը, ապամոնտաժվեցին հուշարձանները, և երբ ռուսական Սևծովյան նավատորմը տեղակայված էր օկուպացված Ղրիմում, շրջափակել է մեր նավահանգիստները, դա համաշխարհային ճգնաժամ է առաջացրել։ Ռուսաստանը ոտնահարել է նաև մարդկանց իրավունքները, Ղրիմի բնակիչների իրավունքները, որոնք Ուկրաինայի ունիտար պետության քաղաքացիներ են։ Այնուամենայնիվ, Ուկրաինան բավականաչափ ուժեղ է, որպեսզի տեսնի ուկրաինական Ղրիմի հեռանկարը»,- ասել է Զելենսկին։

Նրա խոսքով՝ Ուկրաինայի նախաձեռնած «Ղրիմի պլատֆորմի» նպատակը միջազգային կարգի պաշտպանության համար պայքարելն է։ Զելենսկու խոսքով՝ այս ճակատամարտում հաղթելու համար կարևոր է, որ աշխարհը հիշի, թե ինչպես է իրականացվել Ռուսաստանի կողմից Ղրիմի բռնակցումը, որը հանգեցրել է Ուկրաինայի դեմ Ռուսաստանի լայնածավալ ագրեսիային փետրվարի 24-ին։

«Փետրվարի 24-ից հետո սկսված զանգվածային տեռորը ռուսական պետության դեգրադացիայի տրամաբանական շարունակությունն էր, որը վերջերս հրավիրված էր G7-ի սեղանին և այժմ մրցում է անցյալի ամենադաժան ռեժիմների հետ, որոնք պատասխանատու են ցեղասպանության և ագրեսիայի համար»,- ասել է Զելենսկին։

Նրա խոսքով՝ ահաբեկչությանը վերջ տալու և Եվրոպայում և ամբողջ աշխարհում անվտանգությունը վերականգնելու համար Ուկրաինան պետք է հաղթի ռուսական ագրեսիայի դեմ պատերազմում և Ղրիմն ազատի օկուպացիայից։

«Ամեն ինչ սկսվել է Ղրիմում և կավարտվի Ղրիմում»,- ասել է Ուկրաինայի նախագահը։