ԱՄՆ-ի հետ անվտանգության երաշխիքների վերաբերյալ փաստաթուղթը վերջնականապես մշակվել է, սակայն տարածքային հարցերը դեռևս լուծված չեն, հայտարարել է Ուկրաինայի նախագահ Վոլոդիմիր Զելենսկին Դավոսում կայացած Համաշխարհային տնտեսական ֆորումում լրագրողների հետ հանդիպման ժամանակ։

Ուկրաինայի նախագահը նշել է, որ փաստաթուղթը կստորագրվի միայն պատերազմի ավարտից հետո։

Բացի այդ, Ուկրաինայի նախագահը նշել է, որ տարածքային հարցերը դեռևս լուծված չեն։

«Մենք խոսում ենք մեկ հարցի մասին, որը ամենադժվարն է, որը մենք չենք լուծել, և կարծում եմ, որ եռակողմ հանդիպումների ժամանակ նրանք կարող են միմյանց տարբերակներ ցույց տալ, ամեն ինչ վերաբերում է մեր երկրի արևելյան մասին, ամեն ինչ վերաբերում է հողերին։ Սա այն հարցն է, որը մենք դեռևս չենք լուծել», – ասել է Զելենսկին։

Զելենսկու խոսքով՝ և՛ Ռուսաստանը, և՛ Ուկրաինան պետք է փոխզիջումների գնան խաղաղության գործընթացում, և բարձրաստիճան պաշտոնյաների առաջիկա եռակողմ հանդիպումը «դրական» քայլ է։

«Մենք գտնվում ենք այն կետում, երբ կարծում եմ, որ եթե բոլոր կողմերը քրտնաջան աշխատեն, մենք կավարտենք այս պատերազմը», – ասել է Զելենսկին։

Բացի այդ, լրագրողների հետ զրույցում Զելենսկին ասաց, որ հունվարի 23-24-ը Արաբական Միացյալ Էմիրություններում կայանալիք եռակողմ հանդիպմանը ուկրաինական կողմը կներկայացնեն Ազգային անվտանգության և պաշտպանության խորհրդի քարտուղար Ռուստեմ Ումերովը, նախագահի աշխատակազմի ղեկավար Կիրիլ Բուդանովը, նախագահի աշխատակազմի ղեկավարի առաջին տեղակալ Սերգեյ Կիսլիցան, «Ժողովրդի ծառա» կուսակցության առաջնորդ Դավիթ Արախամիան և Գլխավոր շտաբի պետ Անդրեյ Գնատովը։

«Մեր ամբողջ խումբը կմեկնի։ Կլինի եռակողմ հանդիպում։ Այնտեղ կլինեն Ումերովը, Բուդանովը, Կիսլիցան, Արախամիան։ Ես խնդրեցի Գնատովին թռչել Կիևից։ Սա պարտադիր է, քանի որ զինվորականները պետք է այնտեղ լինեն», – ասաց Զելենսկին։

Նա ասաց, որ թիմերը կաշխատեն երկու օր։ Բացի այդ, Ուկրաինայի նախագահը նշեց, որ Ուկրաինան կարող է քննարկել ԱՄՆ նախագահի կողմից ստեղծված «Խաղաղության խորհրդին» միանալու հարցը միայն պատերազմի ավարտից հետո, քանի որ նա հնարավոր չի համարում Ռուսաստանի և Բելառուսի հետ նույն սեղանի շուրջ նստելը։

Զելենսկին հաստատեց, որ Ուկրաինան Թրամփից հրավեր է ստացել միանալու «Խաղաղության խորհրդին»։ Լրագրողների հետ զրույցում Զելենսկին նշեց, որ «Խաղաղության խորհուրդը» պետք է դառնա մի մարմին, որը կմասնակցի հրադադարի վերահսկողությանը։

«Մենք այժմ Ռուսաստանի թշնամիներն ենք։ Բելառուսը Ռուսաստանի դաշնակիցն է, և մենք չենք կարող նրանց հետ նույն սեղանի շուրջ նստել», – ասաց Զելենսկին։