Ուզբեկստանի տրանսպորտի նախարար Իլհոմ Մախկամովի խոսքով՝ Վրաստանն ու Ուզբեկստանը մեծ պոտենցիալ ունեն տնտեսական կապերի խորացման և տարբեր ոլորտներում սերտ համագործակցության ուղղությամբ։

Նախարարը հատկապես շեշտել է Միջին միջանցքի (Middle Corridor) զարգացման գործընթացում երկու երկրների համագործակցության կարևորությունն ու հեռանկարները։

Իլհոմ Մախկամովը բարձր է գնահատել Տրանսկասպյան տրանսպորտային միջանցքի և կապելիության ներդրումային ֆորումը, ինչպես նաև դրա շրջանակներում անցկացված հանդիպումը՝ ԵՄ, Կենտրոնական Ասիայի, Հարավային Կովկասի և Սևծովյան տարածաշրջանի երկրների տրանսպորտի նախարարների մասնակցությամբ։ Նրա խոսքով՝ սա կարևոր քայլ է այդ երկրների, այդ թվում՝ Վրաստանի և Ուզբեկստանի միջև առևտրատնտեսական կապերի խորացման տեսանկյունից։

Նախարարը նաև ընդգծել է Վրաստանի՝ որպես ծովային երկրի նշանակությունը Կենտրոնական Ասիայի և ԵՄ-ի միջև կապերի առումով։ Նա նշել է, որ չափազանց կարևոր է Ուզբեկստանի և Վրաստանի միջև սերտ ու արդյունավետ հաղորդակցությունը նոր տրանսպորտային միջանցքների, դիվերսիֆիկացված երթուղիների ստեղծման, ինչպես նաև առկա ուղիների զարգացման հարցերում։

Իլհոմ Մախկամովը խոսել է նաև Ուզբեկստանի և Վրաստանի միջև տուրիզմի ոլորտում համագործակցության հեռանկարների մասին, նշելով ոլորտի աճող դինամիկան, ինչպես նաև երկու երկրների միջև ավիացիոն կապերի կարևորությունը։ Նա նշել է, որ Թբիլիսի – Տաշքենդ ուղղությամբ իրականացվում են ուղղակի չվերթներ, ինչը, նրա գնահատմամբ, նպաստում է երկու երկրների տնտեսական հարաբերությունների խորացմանը։

Տեղեկությունը տարածել է Վրաստանի տնտեսության և կայուն զարգացման նախարարության մամուլի ծառայությունը։