Ուկրաինայի պաշտպանության նախարարն ակնկալում է, որ հաջորդ տարի Ուկրաինան կմիանա ՆԱՏՕ-ին: Այս մասին Ալեքսեյ Ռեզնիկովը հայտարարել է «Սի Էն Էն»-ին տված հարցազրույցում։

Ռեզնիկովի խոսքով՝ ինքը ՆԱՏՕ-ի գագաթնաժողովը, որը նախատեսված է հաջորդ տարի, համարում է դաշինքին Ուկրաինայի միանալու հավանական ժամանակ։

«Ո՞վ գիտի, գուցե սա շատ կարևոր օր լինի Ուկրաինայի համար»։ Սա ընդամենը իմ կանխատեսումն է»,- ասել է Ռեզնիկովը «Սի Էն Էն»-ին։

Միևնույն ժամանակ, Ռեզնիկովը նշել է, որ Ուկրաինան դաշինքին կարող է միանալ միայն պատերազմի ավարտից հետո և ընդգծել, որ պատերազմը կավարտվի մինչև հաջորդ ամառ, և Ուկրաինան անպայման կհաղթի։

Ուկրաինայի պաշտպանության նախարարը նշել է, որ Ուկրաինայի դաշինքին միանալու առավելությունները մեծացել են՝ հաշվի առնելով Ռուսաստանի դեմ պայքարը։

«Հաղթանակից հետո դա միանշանակ բխելու է ՆԱՏՕ-ի շահերից, քանի որ մենք դարձել ենք ՆԱՏՕ-ի իրական արեւելյան վահանը։ Ուկրաինան հսկայական մարտական ​​փորձ է ձեռք բերել և սովորել, թե ինչպես զսպել և հաղթել ռուսներին՝ օգտագործելով ՆԱՏՕ-ի ստանդարտ զենքերը», – ասել է Ռեզնիկովը։