Ուկրաինայի ներքին գործերի նախարար Իգոր Կլիմենկոն հայտարարում է, որ Դարյալի անցակետի բուֆերային գոտուց ուկրաինացի քաղաքացիների վերադարձը հնարավոր դարձավ ուկրաինական կառույցների, Վրաստանի և Մոլդովայի իրավապահ մարմինների համագործակցության արդյունքում։

ՆԳ նախարարն շնորհակալություն է հայտնում բոլոր ներգրավված կողմերին արդյունավետ համագործակցության համար։ Այս մասին Կլիմենկոն գրել է իր «Թելեգրամ» ալիքում։

«Ներքին գործերի նախարարության կառուցվածքային ստորաբաժանումները մասնակցել են այն ուկրաինացի քաղաքացիների վերադարձի գործողությանը, որոնց Ռուսաստանը հարկադրաբար տեղափոխել էր Վրաստանի սահմանին։ Թերորիստ պետությունը ևս մեկ անգամ խախտում է միջազգային և հումանիտար իրավունքի նորմերը։ Ուկրաինայի քաղաքացիները, որոնցից ոմանք պատիժ էին կրում, իսկ ոմանք համարվում էին անհետ կորածներ, ռուսները տեղափոխել էին Վրաստանի սահմանային անցակետի բուֆերային գոտի։ Առանց փաստաթղթերի, կենսապահովման միջոցների, բավարար սննդի և բժշկական օգնության։ Փաստորեն, նրանք թողնվել էին ճակատագրի քմահաճույքին։

Եվ այսօր, Ուկրաինայի նախագահի հանձնարարությամբ, հայրենիք են վերադարձվել 65 քաղաքացի, այդ թվում՝ 10 կին և 8 ծանր հիվանդ անձ։ Սա հնարավոր դարձավ ՆԳՆ-ի, ԱԳՆ-ի, Առողջապահության նախարարության, Արդարադատության նախարարության, Ուկրաինայի անվտանգության ծառայության, ինչպես նաև Մոլդովայի և Վրաստանի իրավապահ մարմինների համագործակցության շնորհիվ։ Շնորհակալ եմ արդյունավետ համագործակցության համար», – գրել է Կլիմենկոն։

Ուկրաինայի ՆԳ նախարարն ընդգծել է, որ ուկրաինական կողմը պարզում է իր քաղաքացիների բուֆերային գոտում գտնվելու բոլոր մանրամասները, ինչպես նաև Ռուսաստանի կողմից նրանց օգտագործման փորձերը՝ որպես սադրանքի և նվաստացման գործիք։ Նրա խոսքով՝ վերադարձած յուրաքանչյուր քաղաքացու հետ իրականացվելու են իրավական և բժշկական աշխատանքներ ու անվտանգության միջոցառումներ։