Եվրոպայում անվտանգության և համագործակցության կազմակերպության (ԵԱՀԿ) 40-ից ավելի անդամ պետություններ, այդ թվում՝ Հայաստանը, դատապարտել են Ռուսաստանի նպատակաուղղված հարձակումները Ուկրաինայի էներգետիկ ենթակառուցվածքի վրա։ Այս մասին տեղեկացնում է Ուկրաինայի արտգործնախարարությունը։

Հայտարարության մեջ նշվում է, որ Ռուսաստանը 2022 թվականին Ուկրաինա համապարփակ ներխուժման սկսվելուց ի վեր հարձակումներ է գործել էներգետիկ ենթակառուցվածքի վրա, ինչի հետևանքով զոհեր են եղել խաղաղ բնակչության շրջանում, խիստ վնասվել է բնակելի և էներգետիկ ենթակառուցվածքը, ինչպես նաև հոսանքազրկվել են երկրի մեծ մասը։

Հայտարարության համաձայն, առանձին ընդգծվել է, որ ռուսական հարձակումների թիրախներն են էլեկտրաէներգետիկ օբյեկտները, որոնք «Միջազգային ատոմային էներգիայի գործակալությունը» սահմանել է որպես ատոմային կայանների արտաքին էներգամատակարարման հիմնական աղբյուրներ։

«Մենք խստորեն դատապարտում ենք Ռուսաստանի կողմից քաղաքացիական ենթակառուցվածքի դեմ իրականացվող համակարգված հարձակումները։ Խաղաղ բնակչության և քաղաքացիական օբյեկտների անօրինական թիրախավորումը միջազգային հումանիտար իրավունքի, մասնավորապես՝ Ժնևյան կոնվենցիաներով սահմանված սկզբունքների խախտում է և կարող է համարվել պատերազմական հանցագործություն», – նշվում է հայտարարության մեջ։

Ուկրաինայի արտգործնախարարության տվյալներով, այս հայտարարությունն արվել է հետևյալ մասնակից պետությունների անունից՝ Ալբանիա, Անդորրա, Ավստրիա, Բելգիա, Բոսնիա և Հերցեգովինա, Բուլղարիա, Կանադա, Խորվաթիա, Կիպրոս, Չեխիա, Դանիա, Էստոնիա, Ֆինլանդիա, Ֆրանսիա, Վրաստան, Գերմանիա, Հունաստան, Իսլանդիա, Իռլանդիա, Իտալիա, Լատվիա, Լիխտենշտեյն, Լիտվա, Լյուքսեմբուրգ, Մալթա, Մոլդովա, Մոնակո, Նիդեռլանդներ, Նորվեգիա, Լեհաստան, Պորտուգալիա, Ռումինիա, Սան Մարինո, Սլովակիա, Սլովենիա, Իսպանիա, Շվեդիա, Շվեյցարիա, Ուկրաինա, Միացյալ Թագավորություն։