Ուկրաինայի Արևելյան օպերատիվ հրամանատարություն. Պոկրովսկում ռազմական գործողությունները շարունակվում են, և ռուսական կողմի տեղեկատվությունը քաղաքի ամբողջական գրավման մասին չի համապատասխանում իրականությանը
Ուկրաինայի Արևելյան օպերատիվ հրամանատարության տվյալներով՝ Պոկրովսկում շարունակվում են ռազմական գործողությունները, և ռուսական կողմից քաղաքի ամբողջական գրավման մասին տեղեկատվությունը չի համապատասխանում իրականությանը։
Նրանց խոսքով՝ ռուսները քարոզչական նպատակներով Պոկրովսկում կազմակերպել են «դրոշի բարձրացման գործողություններ»։
«Պոկրովսկում շարունակվում են որոնողական-գրոհային գործողությունները և թշնամու ոչնչացումը քաղաքային տարածքում։ Զինվորականները, օգտվելով խիտ մառախուղից, փորձել են ևս մեկ «դրոշի բարձրացման գործողություն» իրականացնել քաղաքի թաղամասերից մեկում, որպեսզի քարոզիչները կարողանան դա օգտագործել որպես ամբողջ Պոկրովսկի վրա վերահսկողություն հաստատելու ապացույց։ Այնուհետև նրանք արագ փախուստի են դիմել. քաղաքը մաքրվում է թշնամու խմբավորումներից», – ասվում է հայտարարության մեջ։
Զինվորականները նշել են, որ քաղաքի վրա ենթադրյալ վերահսկողության քարոզչական պատկեր ստեղծելու օկուպանտների փորձերը նրանց մարդկային ռեսուրսների զգալի կորուստներ են պատճառում։
Ռուսական լրատվամիջոցներն այսօր հաղորդել են, որ ռուս զինվորական հրամանատարները նախագահ Վլադիմիր Պուտինին հայտնել են, որ ռուսական ուժերը գրավել են Պոկրովսկի և Վովչանսկի քաղաքները, որոնք գտնվում են ուկրաինական առաջնագծում։ Ռուսաստանի նախագահի մամուլի քարտուղար Դմիտրի Պեսկովի խոսքով՝ Վլադիմիր Պուտինը այցելել է Միացյալ ուժերի խմբի հրամանատարական կետ, որտեղից տեղեկություններ է ստացել Կրասնոարմեյսկի և Վովչանսկի ազատագրման մասին։
