Ուկրաինայի ագրարային քաղաքականության և սննդի նախարար. Ռուսաստանի հարձակումները ոչնչացրել են երկրի պահեստների մոտ 90%-ը, սակայն ուկրաինացիները չեն մնա առանց սննդի
Ռուսական հարձակումները ոչնչացրել են Ուկրաինայի պահեստների մոտ 90%-ը,- ուրբաթ օրը ճեպազրույցի ժամանակ հայտարարել է Ուկրաինայի ագրարային քաղաքականության և սննդի նախարար Տարաս Վիսոցկին։
Նա ասել է, որ լոգիստիկ ենթակառուցվածքների վրա հարձակումները կարող են ազդել խանութներում ապրանքների լայն տեսականու մատչելիության վրա։
«90%-ն արդեն ոչնչացվել է։ Սակայն դա չի նշանակում, որ ուկրաինացիները կմնան առանց սննդի։ Սովի սպառնալիք չկա», – նշել է Վիսոցկին։
Նախարարը նաև աջակցել է մատակարարման շղթայի մասնակիցների միջև ռիսկերի հավասար բաշխմանը ռուսական հարձակումների հետևանքով ապրանքների ոչնչացման դեպքում։ Միևնույն ժամանակ, Վիսոցկին ընդգծել է, որ պետությունը չի մասնակցում այս տնտեսական և պայմանագրային հարաբերություններին։
«Արտադրանքի մատակարարման և վաճառքի առումով մենք ներկայումս այս շղթայում չունենք մեկ պետական օպերատոր։ Սրանք զուտ տնտեսական և պայմանագրային հարաբերություններ են սուբյեկտների միջև։ Մեր կարծիքով, ռիսկերի հավասար բաշխումը արդարացի կլիներ», – նշել է Վիսոցկին։
Ուկրաինական լրատվամիջոցները հայտնել են, որ օգոստոսի 5-ի գիշերը ռուսական հարվածները վնասել են Fozzy Group-ի չորս բաշխման կենտրոններ, որոնք ապրանքներ էին մատակարարում ուկրաինական խոշոր ցանցերին։ Օգոստոսի 27-ին ռուսական հարձակման հետևանքով վնասվել է KOLO մթերային ցանցի պահեստը: Օգոստոսի 20-ին հարձակում է իրականացվել նաև Կիևի մարզում գտնվող «Ֆորա» ընկերության պահեստի վրա: