Ուկրաինան անճանաչելի է համարում Ռուսաստանի միջնորդի դերը հայ-ադրբեջանական հակամարտությունում
Ուկրաինան Հայաստանին և Ադրբեջանին կոչ է անում հակամարտության քաղաքական-դիվանագիտական կարգավորման և անճանաչելի է համարում Ռուսաստանի միջնորդի դերը։
Այս մասին, ըստ ուկրաինական լրատվամիջոցների, հայտնել է Ուկրաինայի արտաքին գործերի նախարարության մամուլի խոսնակ Օլեգ Նիկոլենկոն։
Նրա խոսքով, Ուկրաինան կոչ է անում Բաքվին և Երևանին հակամարտությունը լուծել քաղաքական և դիվանագիտական ճանապարհով՝ միջազգային իրավունքի նորմերին համապատասխան, մասնավորապես՝ հարգել պետությունների ինքնիշխանությունն ու տարածքային ամբողջականությունը միջազգայնորեն ճանաչված սահմաններում։
«Միևնույն ժամանակ մենք նշում ենք Ռուսաստանի Դաշնության կողմից որևէ միջնորդական և խաղաղարար ջանքերի բացակայությունը, ինչը ևս մեկ անգամ հաստատում է իր պարտավորությունները կատարելու անկարողությունը», – ասել է նախարարության ներկայացուցիչը։
Արտաքին գործերի նախարարությունը նաև հորդորել է ուկրաինացիներին զերծ մնալ Լեռնային Ղարաբաղ այցելելուց, իսկ արդեն տարածաշրջանում գտնվողներին՝ խուսափել ռազմական ակտիվության ոլորտներից։