Վլադիմիր Զելենսկի – Ուկրաինացիները վերադառնում են տուն ռուսական գերությունից, այսօր սկսվել է գերիների փոխանակումը, որը կշարունակվի առաջիկա օրերին
Ուկրաինայի նախագահ Վլադիմիր Զելենսկին հայտարարել է, որ Ռուսաստանի հետ գերիների փոխանակման գործընթացը սկսվել է: Կիևի և Մոսկվայի միջև գերիների փոխանակումը կշարունակվի մի քանի փուլով առաջիկա օրերին: Ռազմագերիների հարցով համակարգող շտաբը հայտնում է, որ անվտանգության նկատառումներից ելնելով՝ ազատ արձակված ուկրաինացիների թվի վերաբերյալ վերջնական տվյալները կհրապարակվեն ավելի ուշ:
Կողմերը պայմանավորվել են գերիների փոխանակման վերաբերյալ Ստամբուլում վերջերս կայացած բանակցությունների ժամանակ:
«Մեր ժողովուրդը տանը է, ուկրաինացիները վերադառնում են ռուսական գերությունից: Փոխանակումը սկսվել է այսօր, որը կշարունակվի մի քանի փուլով առաջիկա օրերին: Այժմ վերադարձողների կատեգորիաների թվում են վիրավորները և ծանր վիրավորները, ինչպես նաև 25 տարեկանից փոքր անձինք: Գործընթացը բավականին բարդ է, կան բազմաթիվ զգայուն մանրամասներ, բանակցությունները շարունակվում են գործնականում ամեն օր: Մենք հույս ունենք, որ Ստամբուլում մարդասիրական հարցերի շուրջ հանդիպման շրջանակներում ձեռք բերված պայմանավորվածությունները լիովին կիրականացվեն: Մենք անում ենք ամեն ինչ բոլորին վերադարձնելու համար: Մենք աշխատում ենք դրա համար բոլոր մակարդակներում: Մենք պետք է տուն վերադարձնենք գերության մեջ գտնվող յուրաքանչյուր մարդու: Շնորհակալություն նրանց, ովքեր օգնում են մեզ», – գրել է Զելենսկին սոցիալական ցանցերում:
Հասանելի տեղեկությունների համաձայն՝ այսօր ազատ արձակվածների թվում են Մարիուպոլի պաշտպանները, որոնք գերության մեջ էին ավելի քան երեք տարի։