Ուկրաինան կանգնած է հնարավոր ընտրության առջև՝ կամ կորցնել արժանապատվությունը, կամ իր գլխավոր գործընկերոջը, – այս մասին հայտարարել է Ուկրաինայի նախագահ Վլադիմիր Զելենսկին տեսաուղերձում։

Նախագահի խոսքով, սա երկրի պատմության ամենաբարդ պահերից մեկն է, և Ուկրաինայի վրա ուժեղ ճնշում է գործադրվում։

«Հնարավոր է, Ուկրաինան կանգնի շատ բարդ ընտրության առաջ՝ կամ արժանապատվության կորուստ, կամ գլխավոր գործընկերոջ կորստի ռիսկ։ Կամ բարդ 28 կետ, կամ ծայրահեղ ծանր ձմեռ՝ մինչ օրս ամենադժվարը և հետագա ռիսկեր՝ ապրել առանց ազատության, արժանապատվության, արդարության և՝ վստահել մարդուն, ով արդեն երկու անգամ հարձակվել է մեզ վրա», – նշել է Զելենսկին։

ԱՄՆ-ի կողմից առաջարկված «խաղաղության ծրագրի» վերաբերյալ Ուկրաինայի նախագահն ասել է, որ Կիևից պատասխան են ակնկալում։

«Սակայն իրականում ես այս պատասխանն արդեն տվել եմ։ 2019 թվականի մայիսի 20-ին, երբ երդում տվեցի ուկրաինացի ժողովրդին։ Մասնավորապես, ես ասացի, որ ես, Վլադիմիր Զելենսկի, ուկրաինացի ժողովրդի կամքով ընտրված Ուկրաինայի նախագահ, երդվում եմ, որ իմ բոլոր գործողություններում կպահպանեմ Ուկրաինայի ինքնիշխանությունն ու անկախությունը, կպաշտպանեմ քաղաքացիների իրավունքներն ու ազատությունները, կպահպանեմ Սահմանադրությունն ու օրենքները, կկատարեմ իմ պարտականությունները բոլոր հայրենակիցների շահերից ելնելով և կբարձրացնեմ Ուկրաինայի հեղինակությունը աշխարհում», – հայտարարել է նա։

Զելենսկու խոսքով, երկրի ազգային շահերը պետք է հաշվի առնվեն։

«Մենք բարձրաձայն հայտարարություններ չենք անում։ Մենք հանգիստ աշխատում ենք ԱՄՆ-ի և մեր բոլոր գործընկերների հետ։ Մենք կառուցողական լուծումներ ենք փնտրում մեր գլխավոր գործընկերոջ հետ։ Ես կներկայացնեմ փաստարկներ, կհամոզեմ, այլընտրանքներ կառաջարկեմ, սակայն մենք իսկապես չենք տա թշնամուն որևէ հնարավորություն ասելու, թե Ուկրաինան խաղաղություն չի ցանկանում, խաթարում է գործընթացը և պատրաստ չէ դիվանագիտությանը», – նշել է նախագահը և խոստացել արագ գործել։

Հիշեցնենք, որ երեկ մամուլում տարածվել էր Դոնալդ Թրամփի «խաղաղության ծրագրի» բովանդակությունը՝ ուղղված ռուս-ուկրաինական պատերազմի ավարտին։ Ծրագրի համաձայն՝ «Ռուսաստանը չի ներխուժի հարևան երկրներ, ՆԱՏՕ-ն չի ընդլայնվի, իսկ Ղրիմը, Լուգանսկը և Դոնեցկը դե ֆակտո կճանաչվեն որպես ռուսական տարածքներ»։ ԱՄՆ-ը պահանջում է, որ Ուկրաինան համաձայնի ծրագրին մինչև նոյեմբերի 27-ը։