Բուդապեշտը Ուկրաինայի հարցում պահպանում է հավասարակշռված դիրքորոշում, և Մոսկվան դա ճանաչում է։ Այս մասին հայտարարել է Ռուսաստանի նախագահ Վլադիմիր Պուտինը՝ Կրեմլում Հունգարիայի վարչապետ Վիկտոր Օրբանի հետ հանդիպման ժամանակ։

Պուտինի խոսքով, Հունգարիայի մայրաքաղաք Բուդապեշտում հանդիպման նախաձեռնողը եղել է ԱՄՆ նախագահ Դոնալդ Թրամփը։

«Մենք ստեղծել ենք մթնոլորտ, որը մեզ թույլ է տալիս բաց խոսել և քննարկել ցանկացած հարց։ Սա տալիս է ոչ միայն խոսելու, այլև ցանկացած խնդրի լուծման ուղիներ որոնելու հնարավորություն։

Շնորհակալ եմ, որ դրական պատասխան տվեցիք ԱՄՆ նախագահի և իմ միջև ձեր երկրում հանդիպման հնարավորության վերաբերյալ։ Եթե մեր բանակցությունները Բուդապեշտի ներգրավմամբ կայանան, ես մեծ ուրախությամբ կընդունեմ դա։ Շնորհակալություն օգնություն ցուցաբերելու ցանկության համար», – ասել է Վլադիմիր Պուտինը՝ դիմելով Վիկտոր Օրբանին։

Նա նաև նշել է, որ Հունգարիայի վարչապետը իր աշխատանքով պաշտպանում է սեփական երկրի և ժողովրդի շահերը։