Վրաստանի տնտեսությունը՝ աշխարհաքաղաքական կամ արտաքին ցնցումներից անկախ, շարունակում է զարգանալ բարձր տնտեսական աճի տեմպերով, – այս մասին հայտարարել է Վրաստանի էկոնոմիկայի և կայուն զարգացման փոխնախարար Վախթանգ Ծինցաձեն։

Նրա գնահատմամբ՝ դա ընդգծում է Վրաստանի կառավարության խելամիտ տնտեսական քաղաքականությունը։

«2025 թվականի հուլիսին Վրաստանի տնտեսական աճը կազմել է 6.5 տոկոս, իսկ հունվար-հուլիս ամիսների միջին տնտեսական աճը՝ 9 տոկոս։ Վրաստանի տնտեսությունում արձանագրված դրական միտումները ևս մեկ անգամ ապացուցում են, որ երկրի տնտեսությունը՝ աշխարհաքաղաքական կամ արտաքին ցնցումներից անկախ, շարունակում է զարգանալ բարձր տնտեսական աճի տեմպերով, ինչը ևս մեկ անգամ ընդգծում է կառավարության խելամիտ տնտեսական քաղաքականությունն ու երկրի տնտեսության դիմադրողականությունը», – նշել է Վախթանգ Ծինցաձեն։

Փոխնախարարի խոսքով, տնտեսական աճին նպաստել են դրական միտումները ապրանքների արտահանման և տուրիզմից ստացված եկամուտների ուղղությամբ։

«Մեր ակնկալությամբ՝ բարձր տնտեսական աճի միտումները կշարունակվեն նաև առաջիկա տարիներին։ Միջազգային դրամահաշվային հիմնադրամի կանխատեսմամբ՝ 2025-2030 թվականներին Վրաստանը կունենա տարածաշրջանում, ինչպես նաև Եվրոպայում, այդ թվում՝ ԵՄ թեկնածու երկրների շարքում, ամենաբարձր տնտեսական աճը, որը միջինում կկազմի 5.4 տոկոս», – նշել է Վախթանգ Ծինցաձեն։

Վրաստանի վիճակագրության ազգային ծառայության տվյալներով՝ 2025 թվականի հուլիսին, նախորդ տարվա նույն ժամանակահատվածի համեմատ, տնտեսությունը աճել է 6.5 տոկոսով։ Հուլիսյան տնտեսական աճին զգալի դրական ազդեցություն են ունեցել տրանսպորտի և պահեստավորման, տեղեկատվության և հաղորդակցության, արվեստի, զվարճանքի, հանգստի և առևտրի ոլորտները։

Վախթանգ Ծինցաձեի մեկնաբանությունը տարածել է էկոնոմիկայի և կայուն զարգացման նախարարությունը։