Վրաստանի Առաջին ալիքի հոգաբարձուների խորհրդի նախագահ Վասիլ Մաղլափերիձեն հայտարարում է, որ հոկտեմբերի 26-ին Վրաստանում կայացած խորհրդարանական ընտրությունները օրինակելի են աշխարհի շատ երկրների համար։

Մաղլափերիձեի խոսքով՝ ընտրություններն անցկացվել են, և Վրաստանի քաղաքացիները պարտավոր են մնալ սահմանադրության շրջանակներում և հարգել միմյանց ընտրությունը։

«1. Վրաստանում տեղի ունեցան ընտրություններ, որոնք օրինակելի են աշխարհի շատ երկրների համար։

2. Չնայած դրսից և երկրի ներսում նախապես արտահայտված խիստ սխալ ենթադրություններին, Վրաստանը ցույց տվեց, որ ունի ամուր ընտրական համակարգ, որը ենթակա չէ կեղծիքների։

3. Միջազգային դիտորդները հայտարարեցին, որ ընտրություններն անցել են խաղաղ և արդար միջավայրում։

4. Խորհրդարանի արդյունքները հրապարակել է Վրաստանի ԿԸՀ-ն՝ միակ մարմինը, որն ունի դրա իրավունքը։

5. Ընտրությունների արդյունքները պետք է որպես պարտադիր փաստ ընդունեն բոլորը, թե ներսում, թե դրսում, ովքեր ճանաչում են Վրաստանի Սահմանադրությունը և ճանաչում են Վրաստանը որպես անկախ պետություն։

6. Նրանք, ովքեր համաձայն չեն այս արդյունքների հետ, կարող են բողոքարկել դատարանում և միայն դատարանում։

7. Վրաստանի բնակչությունը, հիմնվելով սահմանադրության վրա, արտահայտել է իր կամքը, և ընտրությունների միջոցով խորհրդարանում ընդգրկվել են հինգ քաղաքական կուսակցություններ, որոնք նույնպես ստեղծվել են սահմանադրության հիման վրա։ Երկիրն անցել է ընթացակարգային ժողովրդավարության փուլ:

8. Ընտրությունների արդյունքները չճանաչելը կամ չճանաչելու կոչ անելը, անկախ նրանից, թե որտեղից և ումից է դա գալիս, նշանակում է դուրս գալ սահմանադրության շրջանակներից և պետական ​​հեղաշրջման կոչ անել, իսկ եթե դա տեղի ունենա, ապա պատկան մարմինները պետք է ձեռնարկեն օրենքով նախատեսված անհրաժեշտ միջոցները։

9. Վրաստանում ընտրություններ են տեղի ունեցել, և մենք՝ Վրաստանի քաղաքացիներս, պարտավոր ենք մնալ սահմանադրության շրջանակներում և հարգել միմյանց ընտրությունը»,- գրում է Վասիլ Մաղլափերիձեն։