Վարկեթիլիի մետրոյի կայարանը հուլիսի 12-ից 45 օրով փակ կլինի
Մայրաքաղաքի քաղաքապետ Կախա Կալաձեի խոսքով՝ Վարկեթիլիի մետրոյի կայարանը հուլիսի 12-ից 45 օրով փակ կլինի՝ անհրաժեշտ վերականգնողական աշխատանքների պատճառով։
Ինչպես նշել է Կախա Կալաձեն Թբիլիսիի քաղաքապետարանի կառավարության նիստում, վերականգնման նախագիծը պատրաստել է «Probuild Expert» ՍՊԸ-ն՝ արտասահմանյան մասնագետների ներգրավմամբ։
«Ինչպես գիտեք, Վարկեթիլի մետրոյի կայարանի վերակառուցման և կապիտալ վերանորոգման աշխատանքները որոշ ժամանակով հետաձգվել էին։ Հետաձգման հիմնական պատճառը կայարանի սպասասրահի առաստաղի վրա ասբեստ-ցեմենտե սալիկների ապամոնտաժման հետևանքով երկաթբետոնե կամարային կառուցվածքի կայունության լրացուցիչ ուսումնասիրությունների անհրաժեշտությունն էր, որը պահանջվել էր Լևան Սամխարաուլիի անվան դատական փորձաքննությունների ազգային բյուրոյի կողմից։
Պահանջված ուսումնասիրությունների շրջանակներում լրացուցիչ իրականացվել են հետևյալները՝ սպասասրահի երկաթբետոնե կամարի ամբողջ մակերեսի վրա բետոնի և ամրանների վիճակի լաբորատոր ուսումնասիրություն, կամարի հետևի տարածքների ամբողջական երկրաբանական սկանավորում, շարժասանդուղքի թուջե ամրացման մանրամասների վիճակի ուսումնասիրություն և այլն։ Ուսումնասիրությունների արդյունքների հիման վրա պատրաստվել է երկաթբետոնե կառուցվածքների վերականգնման նախագիծ, որը ներառում է հետևյալ հիմնական աշխատանքները՝ առաստաղի քայքայված/վնասված մակերեսների մաքրում և մշակում, կամարի հետևի խոռոչների լրացում/կնքում համապատասխան տեխնիկական լուծումներով, կամարի ջերմաստիճանային ակոսների/կարերի կնքում՝ ստորգետնյա ջրերի արտահոսքը կանխելու համար։ Թուջե ամրացման մանրամասների վերականգնում թեք շարժասանդուղքի թունելում,- ասել է Թբիլիսիի քաղաքապետը։
Նրա խոսքով՝ նշված կայարանի ամբողջական վերականգնողական աշխատանքների ավարտը նախատեսված է նոյեմբեր-դեկտեմբեր ամիսներին։
«Նախագիծը նախատեսում է բավականին լայնածավալ աշխատանքների իրականացում՝ հատուկ տեխնոլոգիական գործընթացի համաձայն, որը չի կարող իրականացվել ուղևորափոխադրումների պայմաններում։ Հետևաբար, երկաթբետոնե կամարի և շարժասանդուղքի թունելի վրա լրացուցիչ վերականգնողական աշխատանքների տևողությունը նվազագույնի հասցնելու համար մենք որոշել ենք հուլիսի 12-ից 45 օրով փակել Վարկեթիլի մետրոյի կայարանը։ Այնուհետև անմիջապես կանցնենք երեսպատման աշխատանքներին։ Անվտանգության նկատառումներից ելնելով՝ անհրաժեշտ է, որ կայարանը փակ լինի 45 օրով», – նշեց Կախա Կալաձեն։