«Թրամփի ճանապարհի» բացումը Հայաստանում որևէ սպառնալիք չի ներկայացնի Վրաստանի համար և որևէ կորուստ չի առաջացնի, ընդհակառակը, Վրաստանի կարևորությունը կաճի,- ասել է ՀՀ նախագահ Վահագն Խաչատրյանը։

Խաչատրյանի խոսքով, եթե նախագիծը իրականացվի, նոր հնարավորություններ կբացվեն Հայաստանի, Թուրքիայի, Իրանի, Ադրբեջանի և նույնիսկ Ռուսաստանի համար։ ՀՀ նախագահը նշել է, որ Թբիլիսիում իր հանդիպումների ժամանակ վրաց պաշտոնյաներից որևէ մտահոգություն չի լսել «Թրամփի ճանապարհի» վերաբերյալ։

«Ամեն ինչ կախված կլինի մեզանից. եթե մենք ուզում ենք ապրել իրական խաղաղության մեջ, եթե ուզում ենք գնալ մեր հարևանների հետ խնդիրները լուծելու ճանապարհով, այլ ոչ թե դրանք սրելով, մենք կհաջողենք։ Սակայն, եթե մենք պատրաստ չլինենք, ապա խնդիրներ կունենանք և կհայտնվենք նախկինում գոյություն ունեցող միջավայրում», – նշել է ՀՀ նախագահը։

Խաչատրյանը նաև հայտարարել է, որ Վրաստանը պատրաստակամություն է հայտնել օգնություն ցուցաբերել տարբեր հարցերում, այդ թվում՝ հայ-ադրբեջանական հարաբերությունների կարգավորման հարցում։