Թուրքիայի արևելքում տեղի ունեցած երկրաշարժի զոհերի թիվը հասել է 35-ի:
Փրկարարներին հաջողվել է փլատակների տակից դուրս բերել 45 մարդու:
31 մարդ մահացել է Էլազիգ գավառում, իսկ չորսը հարևան Մալաթիայի գավառում:
Վիրավորների թիվը գերազանցում է 1600-ը:
Որոնողափրկարարական աշխատանքները այս փուլում իրականացվում են երեք վայրերում:
Հազարավոր փրկարարներ և հարյուրավոր կամավորներ ներգրավված են փրկարարական գործողություններին: Աղետից տուժածների համար բացված են վրաններ, նրանք ստանում են առաջին անհրաժեշտության պիտույքներ և սնունդ:
Թուրքիայի իշխանությունները կոչ են անում բնակիչներին չմտնել երկրաշարժից վնասված շենքեր, քանի որ կա փլուզման վտանգ:
Երկրի աղետների և արտակարգ իրավիճակների նախարարության տվյալների համաձայն, հունվարի 24-ին տեղի ունեցած երկրաշարժի ուժգնությունը կազմել է 6,8 մագնիտուդ: