Վրաստանը արդարացվել է Հաագայում և Ստրասբուրգում, ինչը Վլադիմիր Պուտինը չի կարողացել հանդուրժել, և նրա հանձնարարությամբ ստեղծվել է դավաճանության հանձնաժողով, որի ղեկավարը խորհրդային դահիճի երկրորդ սերնդի ներկայացուցիչ Թեա Ծուլուկիանին է։ Ինչպես նրա հայրը խորհրդային շրջանում մահապատժի վճիռներ էր կայացնում Վրաստանի քաղաքացիների հանդեպ, այսօր Ծուլուկիանին ցանկանում է մահապատժի դատավճիռ կայացնել վրացական պետության նկատմամբ։ Այս մասին հայտարարել է «Միավորված ազգային շարժման» նախագահ Թինա Բոկուչավան։

Նրա խոսքով՝ այսօր շատ պարզ երևաց, որ երկիրը զավթել է ամենաանտիվրացական, հակազգային հանցավոր խումբը, որը Պուտինի հանձնարարությամբ փորձում է վերաշարադրել Վրաստանի նորագույն պատմությունը՝ պատերազմի մեղավորությունը բարդելով Վրաստանի վրա։

«Այսօր մենք գտնվեցինք անարդարության որջ դարձած դատարանում, որտեղ դատավոր հորջորջվող քաղաքական ծառան՝ Մչեդլիշվիլին, ազատազրկման դատավճիռ կայացրեց ութ երիտասարդի հանդեպ, իսկ միևնույն ժամանակ Վրաստանի խորհրդարանի շենքը զավթած մանկուրտները ուղիղ եթերում ցուցադրում էին դավաճանության քրոնիկոնը։ Թեա Ծուլուկիանին վճիռ էր կայացնում ոչ թե մեկ կամ երկու անձի, կամ որևէ քաղաքական գործչի կամ կուսակցության հանդեպ, այլ որպես երկրորդ սերնդի դահիճ՝ նա վճիռ էր կայացնում վրացական պետության դեմ։

Վրաստանը արդարացվել է Հաագայում, ինչպես նաև Մարդու իրավունքների եվրոպական դատարանում, և այս արդարացման վճիռը Վլադիմիր Պուտինն անկարող է եղել ընդունել։ Հենց նրա հանձնարարությամբ ստեղծվել է դավաճանության հանձնաժողովը, որը ղեկավարում էր խորհրդային դահիճի երկրորդ սերնդի ներկայացուցիչ Թեա Ծուլուկիանին։ Այո՛, այս դավաճանության հանձնաժողովը ստեղծվել է Պուտինի հանձնարարությամբ, և ինչպես նրա հայրը մահապատժի վճիռներ էր կայացնում խորհրդային ժամանակաշրջանում Վրաստանի քաղաքացիների հանդեպ, այսօր Թեա Ծուլուկիանին ձգտում էր կայացնել մահապատժի դատավճիռ վրացական պետության դեմ։

Այսօր ևս մեկ անգամ շատ պարզ երևաց, որ երկիրը զավթել է ամենաանտիվրացական, հակազգային հանցավոր բանդան, որը Պուտինի հանձնարարությամբ փորձում է վերաշարադրել Վրաստանի նորագույն պատմությունը, մեղքը բարդել Վրաստանին, ազգային հերոսներին դարձնել հակահերոսներ և, ի վերջո, երկիրը հասցնել Ռուսաստանի հիմնական նպատակին՝ վրացական պետության ամբողջական ոչնչացման, Ռուսաստանի նկատմամբ լիակատար ենթարկման և տարածքային մասնատման։ Այս դավաճանության համար է պատրաստվում հենց Իվանիշվիլիի ռուսական ռեժիմը, և մենք այս դավաճանության քրոնիկոնը պետք է ավարտին հասցնենք միասնական ուժերով։ «Միավորված ազգային շարժումը» կանգնած էր, կանգնած է և կմնա վրացական պետության պաշտպանությունում, ինչպես կանգնած էր 2008 թվականին, երբ երկրի գերագույն գլխավոր հրամանատարը՝ Միխեիլ Սաակաշվիլին, երկիրը չհանձնեց թշնամուն։ Այսօր նույնպես «Միավորված ազգային շարժումը» չի հանձնելու երկիրը թշնամուն այս դավաճան ռեժիմի տեսքով, որը հայտնի է որպես Իվանիշվիլիի ռուս-քոչական ռեժիմ։ Ուստի պետք է միավորվենք և համախմբված ուժերով, մեր կոնսոլիդացիայով, բողոքով և անհանդուրժողականությամբ վերջ դնենք այս դավաճանության քրոնիկոնին, որը մենք տեսանք այսօր դավաճանության հանձնաժողովի եզրակացության հրապարակման ժամանակ Վրաստանի խորհրդարանի շենքում։ Խորհրդարանը պետք է լինի ժողովրդի լեգիտիմության աղբյուրը, սակայն այսօր այն դարձել է դավաճանության բաստիոն, որտեղ փորձում են թաղել վրացական պետությունը», – հայտարարել է Թինա Բոկուչավան։