«երբ ասում են՝ հանեք կալանքը, պիտի ասեն, որ մենք՝ Եվրամիությունը, տվել ենք 15 միլիոն ոչ կառավարական կազմակերպություններին, և այդ գումարից ոչ մի თეთր չի ծախսվել ապակառուցողական գործողությունների համար», – այս մասին հայտարարել է խորհրդարանական մեծամասնության ներկայացուցիչ Թենգիզ Շարմանաշվիլին։

Շարմանաշվիլին մեկնաբանել է ԵՄ արտաքին և անվտանգության քաղաքականության խոսնակի երեկվա հայտարարությունը, որով Եվրամիությունը կոչ է անում Վրաստանի իշխանություններին անհապաղ վերանայել որոշումը՝ անկախ քաղաքացիական կազմակերպությունների բանկային հաշիվների սառեցման վերաբերյալ։

Ինչպես նշել է Շարմանաշվիլին, անընդունելի է կրկնակի ստանդարտների քաղաքականությունը։

«Մեզ համար անընդունելի է կրկնակի ստանդարտների քաղաքականությունը, և մենք չենք պատրաստվում դրան հետեւել։ Նրանք ոչ մի բառ չեն ասում այն մասին, որ սուտ է, թե այս հասարակական կազմակերպությունները գումարներն օգտագործել են Վրաստանում հեղափոխական իրավիճակների ստեղծման համար։ Մենք մեղադրում ենք կոնկրետ արդյունքների վրա հիմնվելով և պնդում ենք, որ այդ միջոցները օգտագործվել են ոչ լեգիտիմ ձևով։ Նրանք որևէ հերքող ապացույց չեն բերում, պարզապես հայտարարում են՝ հանեք կալանքը։ Եթե ուզում են այդպես ասել, պիտի նաև ասեն՝ մենք՝ Եվրամիությունը, տվել ենք այդ 5-10-15 միլիոնը հասարակական կազմակերպություններին, և ամբողջը ծախսվել է միայն դրա համար, և ոչ մի լարի չի օգտագործվել ապակառուցողական կամ ոչ լեգիտիմ գործողությունների համար։ Այդ դեպքում կարող եք ասել՝ չեղարկեք այդ օրենքը։ Բայց դա չեն ասում», – հայտարարել է Շարմանաշվիլին։

Հիշեցնենք, որ դատախազությունում ընթացող քննության շրջանակում, օգոստոսի 27-ին մի քանի հասարակական կազմակերպության բանկային հաշիվների վրա դրվել է կալանք։ Դատախազության պարզաբանմամբ, նշված հասարակական կազմակերպությունների գործունեությունը դուրս է եկել նրանց կանոնադրական նպատակներից, իսկ ստացված ֆինանսների էական մասը ծախսվել է անօրինական գործողությունների վրա։