Վիզաների ազատականացման վերաբերյալ քննարկման մեկնարկը կոնկրետ այս փաստի հետ կապ չունի. մենք բոլորս շատ լավ հասկանում ենք, որ սա «խորքային պետության» ձեռքին եղած զենք է, կարելի է ասել՝ վերջին փամփուշտը, որի նպատակն է անկարգություն մտցնել Վրաստանում եւ իշխանափոխություն իրականացնել ուժով, – այս մասին հայտարարել է Վրաստանի խորհրդարանի պաշտպանության եւ անվտանգության հարցերի կոմիտեի նախագահի առաջին տեղակալ Թենգիզ Շարմանաշվիլին։

Շարմանաշվիլիի խոսքով՝ վիզաների ազատականացումը եվրոբյուրոկրատների ձեռքին շանտաժի գործիք է։

«Սա այնքան ակնհայտ է, որ նույնիսկ ապացույց չի պահանջում։ Պարզապես վարչապետը հիշեցրեց հանրությանը, որ դա այդպես է։ Այդուհանդերձ փաստ է, որ Վրաստանում չորս լուրջ փորձ է եղել հեղափոխության եւ ապակայունացման։ Սա առաջին դեպքը չէ։ Երբ առաջ են քաշվում այդ պայմանները, մի մտածեք, թե դա կապված է ինչ-որ կոնկրետ պայմանների հետ, որոնց կատարումից հետո Վրաստանը կստանա կամ չի ստանա վիզաների ազատականացում։ Սա պարզապես նրանց համար զենք է։ Սա շանտաժի գործիք է», – հայտարարել է Շարմանաշվիլին։

Թենգիզ Շարմանաշվիլիի հայտարարությամբ՝ «Վրացական երազանքի» իշխանության փոփոխություն են ուզում, քանի որ նրանք պաշտպանում են վրացական ինքնիշխանությունը, որոշումները կայացվում են Թբիլիսիում եւ չեն ենթարկվում որեւէ շանտաժի։

«Իշխանության փոփոխություն են ուզում, քանի որ Վրաստանի իշխանությունը պաշտպանում է վրացական ինքնիշխանությունը եւ որոշումները կայացնում է Թբիլիսիում։ Այն չի ենթարկվում որեւէ շանտաժի եւ առաջին հերթին ուշադրություն է դարձնում Վրաստանի ազգային շահերին։ Սա լիովին անընդունելի է այդ շրջանակների համար։ Ցավոք սրտի, նրանք կարծում են, որ Վրաստանում պետք է լինի այնպիսի իշխանություն, որը, ինչպես իրենք են ասում՝ մեր արմատական ընդդիմության հետեւորդները, «մի ոտքի վրա կանգնած լինի» եւ ամեն ինչ անի առանց քննադատության եւ մտածելու։ Սա նույն շանտաժն է։ Նրանք գիտեն, որ սա մեզ համար էգզիստենցիալ նշանակություն ունի։ Վրացի ժողովուրդը համարում է, որ Վրաստանի ապագան մեծ վտանգի տակ է եւ կարող է կործանարար հետեւանքներ ունենալ, եթե այս օրենսդրությանը մի կողմ դնենք եւ չնկատենք, թե ինչ է կատարվում մեր երկրում։ ԵՄ դեսպանը, ով այստեղ է, բացահայտ դիմում է վրաց ժողովրդին՝ «լսեք մեզ եւ արեք այն, ինչ ասում ենք, այլապես վտանգ է սպառնում»։ Ահա դրանից մեծ միջամտություն էլ պետք չէ», – հայտարարել է Թենգիզ Շարմանաշվիլին։