Թեհրանի Գերագույն դատարանի մոտ երկու դատավոր է սպանվել
Գերագույն դատարանի դատավորներ Մոհամմադ Մոգիսեն և Ալի Ռազինը սպանվել են, ևս մեկ դատավոր վիրավորվել է Թեհրանի դատարանի շենքի մոտ տեղի ունեցած հրաձգության հետևանքով։
Այս մասին հայտնում է «IRNA» գործակալությունը։
«Դատավորների վրա հարձակվողն ինքնասպանություն է գործել մինչ ձերբակալվելը»,- ասվում է գործակալության հաղորդագրության մեջ։
Ըստ նախնական տեղեկությունների՝ հարձակվողը Գերագույն դատարանի այցելու չի եղել և դատարանում քննվող գործ չի ունեցել։
Ըստ իրանական լրատվամիջոցների՝ Ալի Ռազինը և Մոհամմադ Մոգիսեն հարձակման են ենթարկվել իրենց գրասենյակում, որտեղ ներկա է եղել նաև Գերագույն դատարանի խորհրդականը, ով թաքնվել է գրասեղանի տակ։
Իրանի իշխանությունը հարձակումն ահաբեկչություն է որակում։
Տեղական լրատվամիջոցները հաղորդում են, որ սպանված դատավոր Մուհամադ Մոգիսեն քաղբանտարկյալների գործեր էր լսում։ Նրա դեմ պատժամիջոցներ են սահմանել ԱՄՆ-ն և Եվրամիությունը։ Նրան մեղադրում են Իրանում մարդու իրավունքների խախտման մեջ։ Երկրորդ մահացած դատավորը՝ Ալի Ռազինը, փրկվել է 1998 թվականին տեղի ունեցած հարձակումից, երբ նրա մեքենայում ռումբ էին տեղադրել:
Սպանված դատավորներն աշխատել են ազգային անվտանգության, լրտեսության և ահաբեկչության հետ կապված հանցագործությունների շուրջ: