Թեա Ախվլեդիանին հանդիպել է Կարմիր խաչի միջազգային կոմիտեի պատվիրակության ղեկավարի և անհետ կորած անձանց հարցերով կոմիտեի հատուկ ներկայացուցչի հետ
Վրաստանի հաշտեցման և քաղաքացիական իրավահավասարության հարցերով պետական նախարար Թեա Ախվլեդիանին հանդիպում է ունեցել Վրաստանում Կարմիր խաչի միջազգային կոմիտեի (ICRC) պատվիրակության ղեկավար Անն Մոնտավոնիի և Կարմիր խաչի միջազգային կոմիտեի անհետ կորած անձանց հարցերով հատուկ ներկայացուցիչ՝ Ագնես Կոտուի հետ։
Պետնախարարի գրասենյակի հաղորդմամբ, Թեա Ախվլեդիանին կենտրոնացել է 1990-ականների զինված գործողությունների և 2008 թվականի օգոստոսյան ռուս-վրացական պատերազմի հետևանքով անհետ կորած անձանց որոնման մարդասիրական գործընթացի հատուկ կարևորության և դրա հետագա կայունության ապահովման վրա։
«Պետնախարարը շեշտեց Կարմիր Խաչի Միջազգային Կոմիտեի՝ որպես Վրաստանում անհետ կորած անձանց որոնման և նրանց ընտանիքներին աջակցելու ծրագրում չեզոք միջնորդի և մարդասիրական մասնակցի դերի և ակտիվ ներգրավվածության կարևորությունը։ Կողմերը քննարկեցին ինտենսիվ համագործակցության արդյունքները, այդ թվում՝ ծրագրի վերափոխման գործընթացի արդիական հարցերը՝ հիմնված Կարմիր Խաչի Միջազգային Կոմիտեի (ICRC) ռազմավարական ուսումնասիրության եզրակացությունների և առաջարկությունների վրա։ Ծրագրվել են ապագա կոնկրետ քայլեր՝ հաշվի առնելով առաջնահերթ ոլորտները», – ասվում է պետնախարարի գրասենյակի հայտարարության մեջ։