ԱՄՆ Սենատի մեծամասնության ղեկավար Ջոն Թունը մերժել է Ներկայացուցիչների պալատի խոսնակ Մայք Ջոնսոնի՝ այն առաջարկը, ըստ որի նախատեսվում էր Վրաստանի կառավարության անդամների նկատմամբ պատժամիջոցներ սահմանող «Բարեկամության ակտը» («Friends Act») կցել ԱՄՆ-ի «Ազգային պաշտպանության լիազորումների ակտին» (NDAA)։ Այս մասին հաղորդում է The Hill–ը՝ հղում անելով կոնգրեսի երկու աղբյուրներին։

Հոդվածում նշվում է, որ Ջոնսոնն ուզում էր «Բարեկամության ակտը» ներառվեր NDAA-ում, որն ունի լայն աջակցություն ինչպես Ներկայացուցիչների պալատում, այնպես էլ Սենատում։ Սակայն սենատոր Թունը արդեն երկրորդ անգամ մերժել է նման առաջարկը վերջին երեք ամիսների ընթացքում։

The Hill-ի աղբյուրների համաձայն՝ Ջոնսոնի նոր պահանջը անակնկալ էր նույնիսկ իր թիմի համար։

«Մենք կարծում էինք, որ այդ նախագիծն արդեն մահացած էր՝ այն բանից հետո, երբ սեպտեմբերին Թունը մերժեց այն։ Մենք վերջին պահին փորձեցինք կցել այն Ազգային պաշտպանության ակտին, սակայն չհաջողվեց հաղթահարել Թունի հակադրությունը», – ասել են Ջոնսոնի օգնականները։

Նշվում է, որ նույն նախաձեռնությունը Սենատում ավելի վաղ նույնպես արգելափակվել էր՝ սենատոր Մարկուեյն Մալինի կողմից ներկայացված տարբերակի ժամանակ։

Հոդվածում հիշեցվում է նաև, որ 2020-ին Մալինը մեղադրել էր «Վրացական երազանք» կուսակցությանը՝ «Ամերիկայի թշնամի մրցակիցների և հակառակորդների» հետ սերտ հարաբերությունների մեջ։ Սակայն 2025 թվականի սեպտեմբերին նա The Hill-ին ասել էր, որ Վրաստանի վարչապետ Իրակլի Կոբախիձեի հետ ունի լավ հարաբերություններ և փոխարենը, որ Վաշինգտոնը պատժամիջոցներ կիրառի, ինքը նախընտրում է «մոտեցման քաղաքականություն»։

«Ես ուզում եմ հնարավորություն ունենալ աշխատել նրանց հետ, ոչ թե պատժամիջոցներ սահմանել։ Ցանկանում եմ նրանց հետ աշխատել, որպեսզի տեսնեմ՝ ինչպես կարող են նրանք ունենալ իսկական ինքնիշխանություն և ազատվել Ռուսաստանի ազդեցությունից», – ասել էր սենատոր Մալինը սեպտեմբերյան հարցազրույցում։