«Գախարիա Վրաստանի համար» կուսակցության անդամ Տատա Խվեդելիանին հայտարարում է, որ «Ֆեդերալիստների» առաջնորդ Թամար Չերգոլեյշվիլիի վարքագիծը անբարոյական է և անընդունելի:

Նրա խոսքով՝ երեխաների թեմաների հրապարակային ներկայացումը «Միասնական ազգային շարժման» ձեռագիրն է:

«Ընդհանուր առմամբ, անձնական կյանքի հարցերի այսպես հրապարակային քննարկումը, երեխաների թեմաների այսպես բացահայտ ներկայացումը՝ դա «Միասնական ազգային շարժման» ձեռագիրն է, ինչը անընդունելի է։ Հենց դրա համար էլ ասում ենք, որ մեզ համար անընդունելի և կարմիր գիծ է «Միասնական ազգային շարժումը» և դրա ցանկացած ճյուղավորումը, որովհետև այդ ձեռագիրն ակնհայտ է նրանց առօրյայում», – նշում է Խվեդելիանին։

Ինչ վերաբերում է ընդդիմադիր ութ կուսակցություններին ուղղված «Միասնական ազգային շարժման» նախագահ Թինա Բոքուչավայի կոչին՝ Թամար Չերգոլեյշվիլիի հետ հարաբերությունները խզելու մասին, Տատա Խվեդելիանին ասում է, որ այդ թեմայով մեկնաբանություն չի կարող անել։

«Դա մեկնաբանելը նույնիսկ լուրջ չի լինի, որովհետև մենք դրանում ներգրավված չենք։ Մենք վաղուց ենք տարանջատվել նրանց խառնաշփոթից, որովհետև պայքարում ենք ռեժիմի դեմ, և սա իսկական պայքար է։ Մենք կռվում ենք տասնապատիկ ուժով՝ մեր երկիրը փրկելու համար, որովհետև այսօր «Վրացական երազանք» ռեժիմը սանձազերծված է Վրաստանում, որին յուրաքանչյուր փուլում այսքան հեշտ և շահավետ աջակցում է «Միասնական ազգային շարժումը»։ Թվում է, որ բոյկոտ իրականացրած ութ կուսակցությունները հիմա արդեն իրար էլ են բոյկոտ հայտարարել։ Դա սպասելի էր։ Մենք միշտ ասում էինք, որ ռեժիմի դեմ պայքարը հեշտ չէ, այն պետք է լինի հետևողական, հաստատուն դիրքորոշումներով։ Արդյունքում նրանք սկզբից ցույց տվեցին իրենց ոչ հաստատուն դիրքորոշումը։ Հիմա էլ դրա համար են նրանց որոշումներում նման տարբերություններ՝ իրար բոյկոտ են հայտարարում։ Այս գործընթացում ընդհանուր նպատակը, ընդհանուր արդյունքը տուժում է, տուժում է վրաց ժողովուրդը, և այս ռադիկալ սցենարներն ու որոշումները ևս մեկ անգամ ավելի վատ վիճակի են դնում մեր ժողովրդին։ Շատ ցավալի է, որ Վրաստանի նախկին նախագահն էլ որոշեց այս գործընթացում դիտորդ լինել։ Դա ցավալի է, որովհետև լրիվ այլ պատկեր կարող էր լինել, եթե լինեին հաստատուն և հետևողական որոշումներ՝ ռեժիմի դեմ անզիջում պայքարի հարցում։ Բոյկոտ ընտրելը ինձ համար պարզապես համագործակցություն է և ջուր է լցնում «Վրացական երազանք»-ի ջրաղացին», – ասում է Խվեդելիանին։

Հիշեցնենք, որ «Միասնական ազգային շարժման» նախագահ Թինա Բոքուչավան դիմել է ութ ընդդիմադիր կուսակցություններին՝ որոշում ընդունելու Թամար Չերգոլեյշվիլիի հետ հարաբերությունները խզելու վերաբերյալ՝ սոցիալական ցանցում օգտագործված երեխաների լուսանկարների պատճառով։ Խոսքը վերաբերում է Facebook-ում հրապարակված մեկնաբանություններին, որտեղ Չերգոլեյշվիլին օգտագործում էր երեխաների լուսանկարներ։ Դրա հետ կապված ինքը՝ Չերգոլեյշվիլին, ներողություն է խնդրել։ Բացի այդ, Թամար Չերգոլեյշվիլին արձագանքել է Թինա Բոքուչավայի հայտարարությանը և նշել․ «Անհասկանալի է, թե ինչ նպատակ ունի Բոքուչավայի սպառնալիքը․ «Միասնական շարժումը» փաստացի արդեն դուրս էր «ությակից», յուրաքանչյուր հաջող միջոցառման հետո մուննաթ էր գալիս և հարվածում ոտքով»։