Նյու Յորքում կայացել է ԱՄՆ նախագահի հատուկ ներկայացուցիչ Սթիվ Ուիթքոֆի և Ուկրաինայի նախագահի գրասենյակի ղեկավար Անդրեյ Երմակի հանդիպումը։

Հանդիպմանը մասնակցել է նաև Ուկրաինայի արտգործնախարարի առաջին տեղակալ Սերգեյ Կիսլիցան։

Երբ, ըստ Երմակի՝ իր սոցիալական ցանցում արված գրառման, հիմնական առաջնահերթությունն է իրական դիվանագիտության առաջխաղացումն ու Վաշինգտոնի գագաթնաժողովում ձեռք բերված բոլոր համաձայնությունների կատարումը։

«Մենք համատեղում ենք մեր ջանքերը։ Հանդիպման սկզբում Սթիվ Ուիթքոֆին տեղեկացրի այն պատերազմի հանցագործությունների մասին, որոնք Ռուսաստանը ամեն օր կատարում է Ուկրաինայում մեր քաղաքների և քաղաքացիների դեմ։ Մասնավորապես խոսեցի Կիևի նկատմամբ զանգվածային հրթիռային և դրոնային հարձակումների մասին, որոնք խլեցին 23 մարդու, այդ թվում՝ չորս երեխայի կյանք։ Ցավոք, Ռուսաստանը ոչինչ չի անում պատերազմը ավարտելու համար և ակնհայտորեն ձգձգում է ռազմական գործողությունները։ Ուկրաինան աջակցում է նախագահ Թրամփի, ինչպես նաև բոլոր գործընկերների վճռականությանը՝ հնարավորինս շուտ հասնել երկարատև խաղաղության։ Ուկրաինան ողջունում է ԱՄՆ-ի բոլոր խաղաղարար նախաձեռնությունները, սակայն, ցավոք, դրանց բոլորին խանգարում է Ռուսաստանը», – գրել է Երմակը։

Զելենսկու գրասենյակի ղեկավարի խոսքով՝ Ուկրաինան բաց է առաջնորդների մակարդակով ուղիղ բանակցությունների համար և պատրաստ է քննարկել լայն շրջանակով հարցեր։

«Մենք հավատում ենք, որ անհրաժեշտ է գլոբալ ճնշում՝ ապահովելու համար, որ Ռուսաստանը իրականում պատրաստ լինի խաղաղության ձգտելուն։ Մասնավորապես՝ դրա նպատակով պետք է անցկացնել առաջնորդների կարևորագույն հանդիպումներ», – գրել է Երմակը և նշել, որ Սթիվ Ուիթքոֆին մոտ ապագայում հրավիրել է Ուկրաինա այցով։