ԱՄՆ նախագահ Դոնալդ Թրամփը Ռուսաստանի նախագահ Վլադիմիր Պուտինի հետ Հռոմում հանդիպման հնարավորությունը քննարկել է Իտալիայի վարչապետ Ջորջիա Մելոնիի հետ։ Այս մասին գրում է «Sky News»-ը։

Ինչպես նշում են «Sky News»-ի աղբյուրները, Թրամփը այս թեմայով Մելոնիի հետ զրուցել է օգոստոսի 7-ին։

Նրանց տեղեկություններով՝ եթե ԱՄՆ և Ռուսաստանի առաջնորդները պայմանավորվեն Հռոմում հանդիպման շուրջ, ապա այն, ամենայն հավանականությամբ, տեղի կունենա Վատիկանում։

Իտալիայի արտաքին գործերի նախարարությունում լրագրողներին հայտնել են, որ ԱԳ նախարար Անտոնիո Տայանիի կարծիքով՝ «անկախ այն բանից, թե որտեղ և ինչպես կկայանա Ռուսաստանի և Ուկրաինայի միջև իրական դիվանագիտական երկխոսությունը, Իտալիան պատրաստ է անկեղծորեն և կառուցողականորեն աջակցել այս գործընթացին»։

Բացի այդ, ինչպես նշում է «Sky News»-ը, եթե Իտալիան կամ Վատիկանը ընտրվեն Թրամփի և Պուտինի հանդիպման վայր, ապա հարցականի տակ կդրվի Քրեական դատարանի ձերբակալման օրդերը, որով Պուտինը պետք է ձերբակալվի։

Իտալիան, որպես Հռոմի ստատուտի ստորագրող երկիր, պարտավոր կլինի դա անել, եթե Պուտինը մտնի երկիր։

Սպիտակ տանը նաև հայտարարել են, որ Պուտինի և Թրամփի հանդիպման վայրերի թվում դիտարկվում են Արաբական Միացյալ Էմիրությունները, Հունգարիան, Շվեյցարիան և Հռոմը։