ԱՄՆ-ի ֆինանսների նախարար Սքոթ Բեսենթի հայտարարությամբ՝ Կանադայի վարչապետ Մարկ Քարնին հետ է վերցրել Դավոսում հնչեցրած որոշ «դժբախտ մեկնաբանություններ»։

«Այսօր նախագահ Թրամփի հետ Օվալաձև սենյակում էի։ Նա զրուցեց վարչապետ Քարնիի հետ, որը, Դավոսում արված որոշ ցավալի մեկնաբանություններից հետո, դիրքորոշումը վերանայեց։ Իհարկե, Կանադան ԱՄՆ-ից է կախված», – նշել է Բեսենթը։

Նա նաև անդրադարձել է Կանադայի վարչապետի՝ Չինաստան կատարած այցին և զգուշացրել, որ եթե Վաշինգտոնը Օտավայի հանդեպ սակագներ սահմանի, «դա Կանադայի համար կործանարար կլինի»։

Հիշեցնենք, որ անցած շաբաթ Դավոսում կայացած Համաշխարհային տնտեսական ֆորումի ժամանակ Մարկ Քարնին կոչ էր արել պետություններին ընդունել, որ «կանոններով ղեկավարվող գլոբալ կարգը» ավարտվում է։ Նա Կանադան ներկայացրել էր որպես օրինակ՝ թե ինչպես կարող են «միջին ուժերը» միասին գործել՝ ամերիկյան հեգեմոնիայից խուսափելու համար։

«Ամեն օր նոր իրադարձություն հիշեցնում է մեզ, որ ապրում ենք մեծ ուժերի մրցակցության դարաշրջանում, և որ օրենքի վրա հիմնված համաշխարհային կարգը վերջնին մոտ է։ Հզորներն անում են այն, ինչ կարող են, իսկ թույլերը՝ դիմանում։ Միջին ուժերը պետք է միավորվեն, որովհետև եթե սեղանի շուրջ չես, ապա մենյուում ես», – հայտարարել էր Քարնին։

Քարնիի ելույթից հետո Դոնալդ Թրամփը չեղարկել էր Կանադային «Խաղաղության խորհրդին» միանալու հրավերը և սպառնացել 100% սակագներ սահմանել կանադական ապրանքների վրա։