Սիրիական բանակը կրկին հարձակում է սկսել Հալեպ քաղաքի վրա, որտեղ բախումները շարունակվում են արդեն երրորդ օրը, հաղորդում է Reuters-ը։

Սիրիական բանակը հրապարակել է քարտեզներ, որոնցում նշված են Հալեպ քաղաքի այն հատվածները, որոնք հարվածի տակ կհայտնվեն։ Սիրիական բանակը կոչ է արել քաղաքացիներին լքել այդ տարածքները։ Հալեպի մի քանի թաղամասերում ուժի մեջ է պարետային ժամ։

Հալեպում բախումները սկսվել են հունվարի 6-ին։ Սիրիայի քաղաքացիական պաշտպանության ուժերի տվյալներով՝ բախումների պատճառով քաղաքը լքել է 13,000 մարդ, այդ թվում՝ կանայք և երեխաներ։

Իր հերթին, քրդական «Սիրիական ժողովրդավարական ուժերի» ներկայացուցիչները հայտնում են, որ Դամասկոսի հետ կապված խմբավորումների հետ բախումները շարունակվում են Հալեպի մի քանի թաղամասերում։

ԱՄՆ-ի կողմից աջակցվող Սիրիական ժողովրդավարական ուժերը (SDF) վերահսկում են Սիրիայի հյուսիս-արևելքը։ Այս տարածքներում, այդ թվում՝ Հալեպի որոշ հատվածներում, ստեղծվել է քրդերի գլխավորությամբ կիսաինքնավար վարչակազմ, որը մինչ այժմ դիմադրել է իսլամիստների գլխավորած կառավարությանը ինտեգրվելուն։

ԱՄՆ-ն փորձել է միջնորդել քրդերի և Սիրիայի կառավարության միջև բանակցություններում, սակայն անցյալ շաբաթ այդ փորձը ձախողվել է։

Թուրքիան հայտարարել է, որ պատրաստ է օգնել Սիրիայի կառավարությանը, եթե Դամասկոսը նման առաջարկ անի Անկարային։